Փետրվարի 2-ը երիտասարդ, խոստումնալից լրագրող Սարիկ Սևադայի կյանքի թերևս յուրահատուկ օրերից մեկն էր, 30 հայրենադարձի հետ ծավալած նրա հարցազրույցներն ամբողջացնող հեղինակային՝ <<Հայրենադարձի աչքերով>> անդրանիկ ժողովածուի շնորհանդեսը, որին ներկա էին և՛ գրքի հերոսները, և՛ մեր կյանքի տարբեր ոլորտների հայտնի ներկայացուցիչներ, զանգվածային լրատվամիջոցներ, ընկերներ ու գործընկերներ, հարազատներ:
Միջոցառումը Հայաստանում հաստատված, կայացած, ներդրումներ կատարած հայրենադարձված գործարարների, արվեստի ու գիտության ոլորտում խարիսխ գցած մեր հայրենակիցների համար յուրօրինակ մի տոնախմբություն էր նաև:
Բոլոր ելույթ ունեցողները, ջերմորեն շնորհավորելով Սարիկ Սևադային, արժևորելով նման ձեռնարկի ծնունդը, դրա կարևորությունը համարելով շատ արդիական ու պահանջված՝ հույս հայտնեցին, որ ժողովածուն Սփյուռքում ապրող մեր շատ հայրենակիցների համար դեպի Հայրենիք բերող շուտափույթ վերադարձի լուսարձակներից մեկը կդառնա:
Հուսանք, որ մասնագիտությամբ միջազգայնագետ-եվրոպագետ Սարիկ Սևադան հայաստանյան լրագրողական դաշտում առավել հաստատուն քայլեր կանի՝ իր բացառիկ աշխատասիրության, ընդունակությունների, նպատակասլացության, պատասխանատվության մեծ զգացումի, անվերջ սովորելու ցանկության և լրագրողի աշխատանքի հանդեպ ունեցած չմարող հետաքրքրության ու սիրո շնորհիվ:
Բարի՛ երթ, երիտասա՛րդ գործընկեր:
Կարինե Ավագյան