«Կառավարությունը, մեղքի զգացումից ելնելով, 30 միլիոն դրամ է հատկացրել «Մարտի 1»-ի զոհերի հարազատներին, որպեսզի լռեն, չբարձրաձայնեն»,- լրագրողների հետ հանդիպմանն ասաց «Մեզ բացակա չդնեք» ՀԿ նախագահ Սաթիկ Խլղաթյանը:
Նրա խոսքով, եթե հիմա այդ հարազատները փորձում են սևազգեստ մայրերին ինչ-որ մեկի հրահանգով դատի տալ, չարաչար սխալվում են, այդ 9 հոգին դատարանում կստանան իրենց պատասխանը:
Ասուլիսին ներկա փաստաբան Ալեքս Կոչուբաևը տեղեկացրեց, որ հայցի հիմքում ընկած է «Զինվոր» հասարակական խորհրդի նախագահ Մարգարիտա Խաչատրյանի այն արտահայտությունները, թե ինչի զոհված զինծառայողներին և «Սասնա ծռերի» ահաբեկչական խմբավորման սպանդի հետևանքով մահացած ոստիկաններին, հայրենիքին մատուցած ծառայությունների ընթացքում մահացած անձանց ընտանիքներին փոխհատուցում չի տրամադրվում, իսկ «Մարտի 1»-ի դեպքերի ժամանակ զոհվածների իրավահաջորդներին տրամադրվում է: Համանման բովանդակությամբ հայտարարություն կատարել է նաև Սաթիկ Խլղաթյանը:
««Մարտի 1»-ի զոհերի իրավահաջորդները սա վերագրել են իրենց, գտնում են, որ ոտնահարվել է իրենց պատիվն ու արժանապատվությունը, տարածվել է զրպարտություն համարվող տեղեկություններ»,- ասաց փաստաբանը:
Նրա խոսքով, «Մարտի 1»-ի դեպքերի ժամանակ զոհվածների իրավահաջորդներին նաև վրդովեցրել է այն բնութագրումը, որ «Մարտի 1»-ի գործողությունները որակել են թալան: Ալեքս Կոչուբաևը մեջբերեց այդ գործով դատավճռից մի հատված՝ նշելով. «Այս դատավճռի հետ ծանոթացող անձն այլ բան, քան «Մարտի 1»-ի գործողությունները թալան որակել, լրիվ իրատեսակ է ու հիմնված փաստական տվյալների վրա: Այս դատավճիռը վերանայված չէ, օրինական ուժի մեջ մտած է, այստեղ առկա բոլոր փաստերը համապատասխանում են իրականությանը, քանի դեռ հակառակն ապացուցված չէ: Այսինքն այս դեպքում գործ ունենք իրական փաստերի հետ»:
Փաստաբանի խոսքով, ինքն ու իր վստահորդները որոշել են, որ իրենք այս հայցից պաշտպանվելու որևէ խնդիր չունեն, իրենց համար ևս մեկ հարթակ է բարձրացնելու այն կարևոր սոցիալական խնդիրները, որոնք մայրերը տարիներ շարունակ բարձրացնում են, նաև «Մարտի 1»-ի դեպքերի վրա իրական լույս սփռել, քանի որ այսօր այդ դեպքերն ամբողջ ծավալով և ըստ էության քողարկվում է: Նա նշեց, որ հայցվորնեերից մեկը «Մարտի 1»-ի զոհերից Գոռ Քլոյանի հայրն է՝ Սարգիս Քլոյանը, որը վիրավորվել է հենց թալան բնութագրումից:
«Դատական նիստի ընթացքում մենք պատրաստ ենք բոլոր թեզերը հիմնավորել: Այս ներկայացված հայցադիմումն այս փուլում վարույթ ընդունվելու շանսեր չունի, դրանում առկա են բազմաթիվ դատավարական սխալներ, որոնք մեզ գործով վարույթը կարճելու հնարավորություն են տալիս, սակայն իմ վստահորդներն ունեն դիրքորոշում, որ մենք չպետք է, համենայնդեպս այս փուլում, մեր դատավարական իրավունքից օգտվել և դատարանից գործի կարճում չենք պահանջել, ընդհակառակը՝ պաշպանվելու փոխարեն մտադիր ենք Խլղաթյանի և Խաչատրյանի ամեն ասած բառը դատարանում հիմնավորել»,-ասաց Ալեքս Կոչուբաևը:
Սաթիկ Խլղաթյանն ընդգծեց, որ ինքը որևէ մեկից ներողություն չի խնդրի. «Որևէ մեկը որ 30 միլիոնով կարող է գնալ դատարաններում ցուցմունք տալ ու անհեթեթ բաներ ասել, ես չեմ պատրաստվում դա անել: Մենք ոչ մեկից չենք վախում, պատրաստ ենք դատարանում գնանք մինչև վերջ: Չկա այս պետության մեջ մի մարդ, որից ներողություն պետք է խնդրեմ: Թող իրենք մեզանից ներողություն խնդրեն: Կամ ումի՞ց ես պետք է ներողություն խնդրեմ, ո՞վ են իրենք, որ ես իրենցից ներողություն խնդրեմ: Թող շրջվեն ու իրենց անցյալը տեսնեն ու մտածեն, թե ում են ասում ներողություն խնդրի: Պետք է ամաչեն»:
Ասուլիսին ներկա Մարգարիտա Խաչատրյանը նույնպես ասաց, որ չի պատրաստվում որևէ մեկից ներողություն խնդրել:
«Որդուս զոհվելուց հետո ես կանգնել եմ բանակի կողքին, շուրջ 21 տարի քայլում եմ բանակի կողքին, այդքան տարիներ միայն գովեստի եմ արժանացել: Բայց երբ սկսել եմ կառավարության շենքի դեմ զոհված զինծառայողների ընտանիքներին կողքին կանգնել, սկսել է պայքարը, հարգարժան պարոնայք ղեկավարներ, չեք կարող ինձ վարկաբեկել:
Ես չեմ պատրասվում ներողություն խնդրել: Եթե պետք է, վեց դատական ատյան կփոխեմ, բայց նույն տիկին Մարգարիտան կմնամ»,- ասաց Զինվոր» հասարակական խորհրդի նախագահ Մարգարիտա Խաչատրյանը: