Այսօրվա սահմանադրության գրողները պլանավորել էին, որ առնվազն մինչև 2035 թվականը Հայաստանում ժողովրդավարություն, ժողովրդի իշխանություն չի լինելու: Այսպիսի ՍԴ է ձևավորվել և Հրայր Թովմասյանը ՍԴ է ուղարկվել որպես կոռումպացված, հակաժողովրդական, ապօրինի համակարգի «պահապան շուն»: Այլ կերպ ասած, հենց Սահմանադրական դատարանում է թողված շան գլուխը:
Փաշինյանի խոսքերով, ՀՀ հպարտ քաղաքացիները երբեմն զայրանում են, չեն հասկանում, թե ինչի հաշվին են ժամանակ առ ժամանակ հոխորտում նախորդ կոռումպացված ռեժիմի ներկայացուցիչները, նրանց սպասարկողները և օտարածին մականունով քիլերները, որոնց օրենքը շուտով անխուսափելիորեն առնելու է սեփական ոտքերի տակ. «Դուք լսելու եք այդ շնաբարո դուրսպրծուկների վնգստոցը: Նրանց հույսը Հրայր Թովմասյանի և գործող ՍԴ-ի վրա է:
Նրանք քմծիծաղով ու արհամարհանքով են վերաբերում իրենց դատավարություններին, որով շուտով իրենց ՍԴ-ն իրենց կազատի պատասխանատվությունից և շնագայլերի իրենց ոհմակը կհարձակվի ժողովրդի լավատեսությունը ծծելու: Բայց մենք դա թույլ չենք տա: Մենք նրանց կպարտադրենք այլ գործողություն, որի մեկնարկը տալիս ենք այսօր:
Մենք այսօր պետք է որոշում կայացնենք այս հարցը ժողովրդով լուծելու համար: Հույս ունեմ ԱԺ-ն որոշում կկայացնի համաժողովրդական հանրաքվե նշանակելու մասին: Հոդվածի փոփոխությամբ, հին կարգով ընտրված բոլոր դատավորների լիազորությունները պետք է դադարեցվեն: Դա տեղի կունենա այն պարագայում, երբ ՀՀ քաղաքացիները գնան ընտրական տեղամասեր և այո ասեն փոփոխություններին, հեղափոխությանը, ժողովրդավարությանը, ժողովրդի իշխանությանը»:
***
Փաշինյանի խոսքերով, Հրայր Թովմասյանը Սահմանադրության գործող տեքստոմ, առնվազն սահմանադրական փոփոխությունների հարցում ՍԴ-ին ավելի մեծ լիազորություն է վերապահել, քան վերապահված է ՀՀ ժողովրդին, որը երկրի իշխանության բարձրագույն կրողն է:
«Ըստ գործող կարգավորման, Սահմանադրության մեջ հնարավոր չէ փոփոխություն անել առանց ՍԴ-ի թույլտվության: Այսինքն, ՀՀ ժողովուրդը կարող է ցանկանալ որևէ բան փոխել Սահմանադրության մեջ, սակայն ՍԴ-ն թույլ չտա՝ այդ ձգտումը համարելով «հակասահմանադրական»: Ընդ որում, որևէ մեկը որևէ տեղ չի կարող վիճարկել այդ դիրքորոշումը: Այսինքն, այդ վիճակում ժողովուրդը կարող է Հրայր Թովմասյանին ՍԴ նախագահի ապօրինի ձեռք բերված կարգավիճակից զրկելու ցանկություն ունենա, սակայն ՍԴ-ն դա թույլ չտա՝ այն համարելով հակասահմանադրական: Հրայր Թովմասյանի և ՀՀԿ-ի ձեռքով Հայաստանում հայտնվել է մի սուբյեկտ, որը վեր է ժողովրդից: Դա ՍԴ-ն է: Սա ժողովրդին պատկանող իշխանության յուրացման աղաղակող օրինակ է»,-ասաց Փաշինյանը:
«Աբսուրդը հասել է այնտեղ, որ ՍԴ-ն անբեկանելի որոշումներ կարող է կայացնել նույնիսկ իր կարգավիճակի վերաբերյալ: Ինչպե՞ս կարող է նման բան լինել: Կան իրավաբաններ, ովքեր հակադարձում են, թե այդ դեպքում ինչպես է, որ ԱԺ-ն , կառավարությունը, նախագահը որոշում են կայացնում իրենց վերաբերյալ: Սակայն այս բոլոր մարմինների որոշումները կարող են բողոքարկվել ՍԴ-ում, վարչական դատարանում: Միակ մարմինը, որի որոշումները չեն կարող բողոքարկել ՍԴ-ն է: Ես չեմ ասում, որ ՍԴ-ի որոշումները պետք է դարձնել բողոքարկելի: Ես ասում եմ, որ այն դեպքերում, երբ խոսքը վերաբերում է այլ մարմինների ուղղակի լիազորություններին, ժողովրդի իշխանությանը, ՍԴ-ի լիազորությունները պետք է լինեն կանոնակարգված, կանխատեսելի և սահմանափակած ժողովրդի ինքնիշխան իրավունքով»: