Երևանում տաս երթուղի սպասարկող տրանսպորտային միջոցների վարորդները «ժողովրդի խաթր» դադարեցնում են գործադուլը, սակայն մեկ շաբաթ ժամանակ են տալիս պատկան մարմիններին լուծելու իրենց վեր հանած խնդիրները, այլապես կդիմեն այլ միջոցների:
«Գազը վերջին մեկ ամսում 200, 300, 400 դրամով բարձրացել է: Մեկ զապրավկան հասել է 10 հազար դրամի, ամիսներ առաջ 7000 դրամ էր: Կառավարության որոշմամբ միջին աշխատավարձը բարձրացվել է: Հիմա բարձրանում են պլանը, որ միջին աշխավարձը բարձրացնեն: Ընդհանուր գումարը օրական կազմում է 27 հազար 700 դրամ, որը գազելով անհնարին է 5 ռեյսով»,- լրագրողներին ասաց վարորդներից մեկը:
Նրանք պահանջում են հարկերը մի քիչ իջեցնեն կամ գազի գինը իջեցնեն, ակտերը զիջեն ու սպասում են հարցի լուծմանը:
«Եկամուտը կազմում է այնքան, որ պարտք ենք մնում, փող չենք ստանում: Եթե չեմ կարողանում 27 հազարը վճարել, այսինքն՝ վրայից տանում եմ տուն, որպեսզի պահեմ տունս, ամսվա վերջում էլ աշխատավարձ չեմ ստանում, մի բան էլ իրենց պարտք ենք մնում»,- ասաց վարորդներից մեկը:
Երևանի թիվ 10 երթուղին սպասարկող ուղևորափոխադրող ընկերության տնօրենն ասաց, որ վերջին 2-3 ամիսներին ընկերության վրա ֆինանսական բեռ է ծանրացել, չգիտեն, որտեղից հայթայթեն այդ գումարը:
«Մենք նամակներով, գրություններով դիմել ենք պատկան մարմիններին: Օրենքներ են մտել կիրառության մեջ, որոնք պետք է կատարվեն։ Մենք էլ դժգոհություններ ունենք՝ ուղևորահոսքի պակասություն, քաղաքի երթևեկության անհնարինություն, ամեն ինչի գնաճ, նաև ԱՊՊԱ-ի թվերի շատ մեծ բարձրացում: Այդ ամեն ինչը բերել է սրան: Վարորոդները մեզնից չեն դժգոհում, դժգոհում են ծախսերի ավելացումից։ Ծախսերն ավելանում են, մուտքերը՝ նվազում։
Քաղաքապետարանի տրանսպորտի վարչության պետը մեկ շաբաթ, 10 օր ժամանակ խնդրեց։ Ընդհանրացնում ենք մեր գրության մեջ խնդիրները, փոխանցենք իրենց, խոսք են տվել ինչ որ ձևով մեզ աջակցեն: Տեսնենք: Տաս օրվա մեջ պայմանավորվել ենք նույն հարցերը քննարկել, հասկանալու, թե ինչպես ենք աշխատելու: Հասել ենք նրան, որ կամ ձեռնարկությունը պետք է փակվի։ Ճիշտն ասած՝ այսօր արդեն պատրաստվում էինք դիմում գրել, որ փակվում է, բայց 10 օր կսպասենք, տեսնենք՝ ինչ կլինի։ Ֆինանսական միջոցներ չկան, բացարձակ անհնարին վիճակ է»,-ասաց ընկերության տնօրենը։
Նա նշեց, որ իրենց պարկը ամենամեծն է քաղաքում, մոտ տասը օր առաջ իրենց գծերից մեկն արդեն իսկ փակվել է, 12-ից դարձել է 11։
«Եթե աշխատում ես օրենքի դաշտում, ուրեմն նման իրավիճակների մեջ չես կարող չընկնել: Նման կազմակերպությունների մասին է խոսքը: Բոլորն ունեն խնդիրներ: Ինչքան մեծ՝ այդքան պրոբլեմները շատ»,- ասաց ընկերության տնօրենը։