Այն բոլոր ուժերը, եթե դրանք կան, որոնք լինելու են այս ամենի կողքին, նրանք մեղսակից են լինելու, որովհետև ժամանակը գալու է և պարզ է լինելու, որ սա հակաօրինական ճանապարհ է, հակաօրինական հանրաքվե է։ Այս մասին այսօր լրագրողների հետ զրույցում ասաց ՀՀԿ կանանց խորհրդի նախագահ Կարինե Աճեմյանը՝ անդրադառնալով սահմանադրական փոփոխությունների նախագծին և հանրաքվեին։
Կարինե Աճեմյանը նշեց, որ ՀՀԿ-ն քննարկել է սահմանադրական փոփոխությունները և եկել եզրակացության, որ հանրաքվեն ոչ պետականամետ, հակաօրինական, բազմաթիվ խախտումներով նախագիծ է։
«Սա իրականում հակապետական, հակասահմանադրական քայլ է, և այս ժամանակահատվածը մեզ ոչ մի լավ տեղ չի տանի։ Նրանք արդեն խախտելով հանրաքվեի մասին օրենքը՝ անցել են քարոզարշավի։ Արդեն իսկ իրենց տարերքի մեջ են, այն առումով, որ իրենցը հայհոյանքներն են, անեծքներն են։ Այդ տիրույթում նրանք որևէ մրցակից չունեն և չեն կարող ունենալ»,- դիտարկեց նա։
Ըստ նրա՝ իշխանությունն արդեն զրոյացնում է ներդրումները, և հանրաքվեն այն ճանապարհն է, որով Նիկոլ Փաշինյանը կհայտնվի իր սիրելի վայրում՝ փողոցում․ «Կբղավեն, իրենց ամբողջ թշնամանքն ու ատելությունը նորից կգեներացնեն։ Միջազգային հեղինակության առումով այս ամենը մեզ համար շատ վտանգավոր է»։
Նրա դիտարկմամբ ինստիտուցիոնալ և զսպվածությունը բառերը որևէ կապ չունեն այս իշխանության հետ, քանի որ իշխանությունն իրեն անքննելի է համարում։ Ըստ նրա՝ անհասկանալի է, որ բոլորը հետևելով Նիկոլ Փաշինյանի խոսքին՝ իրենց անհաջողությունները կապում են նախկինների հետ, սակայն հիշեցրեց, որ ներկայիս Կենտրոնական ընտրական հանձնաժողովի անդամները ընտրվել են հենց նախկին իշխանության կողմից։
«Նրանք բոլորը նախկիններից են, եթե նախկինները ընտրակեղծիքներ են թույլ տվել, ապա Նիկոլ Փաշինյանը նրանց հետ չպետք է աշխատեր, եթե նրանք լավ են աշխատել, ապա բոլոր այն ստերը, որոնք հորինվել են նախկին ընտրակեղծարարությունների մասին պարզ է, որ ջրի երես են դուրս գալու»,- նկատեց Աճեմյանը։
Հանրաքվեի քարոզարշավի ընթացքում թշնամանքն ու ատելությունը, ըստ նրա՝ այն մակարդակի կհասնի, որ բախումներ կարող են լինել, ուստի նկատեց, որ այն ուժերը, որոնք հասկանում են, թե ինչ է կատարվում, չպետք է մեղսակից լինեն այս ամենին։