Տուժողի իրավահաջորդի ներկայացուցիչ Տիգրան Եգորյանը հասկանում է ՀՀ երկրորդ նախագահ Ռոբերտ Քոչարյանի դիրքորոշումն առ այն, որ նրան զեկուցել են հատուկ կառույցները և ինքը կատարել է որոշումներ՝ կապված այդ զեկույցների հետ։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց Եգորյանը՝ ավելացնելով, որ դա պաշտպանական տակտիկա է և դրա հիմքով քրեական հետապնդումը դադարեցնելն անհիմն է։ Փաստաբանը նշեց, որ քրեական հետապնդումը դադարեցնելու և գործի վարույթը կարճելու մասին միջնորդություններն անհիմն են և ենթակա մերժման։
Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։
Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։