Նիկոլ Փաշինյանի Գերմանիայում արած հայտարարությունը, թե «կուսակցականացված դատարանը խոչընդոտում է ու կասկածի տակ է դնում ինստիտուցիոնալ բարեփոխումների ողջ օրակարգը Հայաստանում» իրականության հետ որևէ կապ չունի։ Այս մասին այսօր խորհրդարանական ճեպազրույցների ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։
Նա նշեց, որ չի կարծում, թե հանդիպմանը ներկա մարդիկ չգիտեն դրա մասին. «Ես այն օրը Վահագն Հովակիմյանին ասել եմ՝ օրինակ բերեք մեկ ռեֆորմ, որ դատարանը տապալել է։ Չկա որևէ ռեֆորմ, ասել եմ օրինակ բերեք քաղաքացիներին՝ վերջին 2 տարիներին կեղեքելու դեպքեր, օրինակ չի բերվել»։
Խոսելով դատարանի կուսակցականացման վերաբերյալ Փաշինյանի դիտարկման մասին, Մարուքյանն ասաց, որ նման բան չկա։
«Օրինակ` տիկին Ալվինա Գյուլումյանը, վստահ եմ, որ որևէ կերպ կուսակցականացված անձ չէ, նա Մարդու իրավունքների եվրոպական դատարանի դատավոր է եղել, հետևաբար համապատասխանում է այդ բարձր դատարանի չափանիշներին։ Չի կարելի միայն Հրայր Թովմասյանի պատճառով բոլորին նույն արշինով չափել ու վիրավորել»,-ասաց Մարուքյանը։
Խմբակցության անդամ Մանե Թանդիլյանն էլ ավելացրեց, որ դատավորները նշանակվել են տարբեր նախագահների օրոք։
ՀՀ Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանն իր ներկայացրած հաղորդման առնչությամբ հրավիրվել է Քրեական ոստիկանության գլխավոր վարչություն, aյս մասին Մարուքյանը նշեց փետրվարի 14-ին խորհրդարանում տեղի ունեցած ճեպազրույցների ընթացքում:
«Երեկ ինձ հրավիրել են քրեական ոստիկանություն, ես այնտեղ համապատասխան բացատրություն եմ տվել, հաղորդումն արձանագրվել է: Համապատասխան մարմիններն ընթացք կտան»,- ասաց Մարուքյանը: