Ռազմահայրենասիրական երգերի ստեղծագործող ու կատարող ամենահայտի մարդկանցից մեկը` մեր բոլորի կողմից սիրված ու գնահատված Գուսան Հայկազունը (Գագիկ Նազարյան), առողջական լուրջ խնդիրներ ունի: Այս մասին տեղեկացանք «Տեսակետ» մամուլի ակումբում կազմակերպված ասուլիսի ժամանակ, որին ներկա էին նրա ընկերներն ու բարեկամները` գեներալ-մայոր Աստվածատուր Պետրոսյանը, գեներալ-մայոր Արկադի Տեր-Թադևոսյանը (Կոմանդոս), երգիչ Արսեն Գրիգորյանը (Մրրո), «Ազդակ» թերթի ֆոտոլրագրող Գաբրիել Փանոսյանը, ՀՀ ՊՆ «Զորական» անսամբլի գեղարվեստական ղեկավար Արամ Գալստյանը, «Հայկազունք» համույթը, Արմինե և Սիփան Հայկազունները (Գուսան Հայկազունի տիկինը և որդին):
Նրանք համախմբվել էին` զորակցելու «Հայկազունք» երաժշտական համույթի գեղարվեստական ղեկավար, ՀՀ մշակույթի վաստակավոր գործիչ, Արցախյան պատերազմի մասնակից, «Երկրապահ» կամավորների միության անդամ Գուսան Հայկազունին, որը «Երևան» բժշկական կենտրոնի` 6-րդ հիվանդանոցի ղեկավար, ռազմական բժիշկ, ազատամարտիկ Տարոն Տոնոյանի շնորհիվ արդեն տարել է մեկ թանկարժեք վիրահատություն: Ի դեպ` սա բժշկի պրակտիկայում առաջին դեպքը չէ. նա բազմիցս օգնել ու իր միջոցներով բուժել է հարյուրավոր ազատամարտիկների ու արվեստագետների: Սակայն Գագիկ Նազարյանի ծանր հիվանդությունը չի նահանջել, և նա բուժումը շարունակում է «Նատալի Ֆարմ-Մալաթիա» բժշկական կենտրոնում: Բուժման համար անհրաժեշտ է մեծ գումար, քանի որ միայն դեղերից որոշների մեկ հատն արժե 450-650 եվրո: Ուստի Գուսանին աջակցելու համար «Անելիք» բանկում արդեն իսկ բացվել է հաշվեհամար` Գագիկ Նազարյանի (Գուսան Հայկազուն) անունով.
11805003430500 ՀՀ դրամ
11805003430501 ԱՄՆ դոլար
Առաջին ներդրումն ունեցել է հենց «Անելիք» բանկը: Իրենց ներդրումն են ունեցել նաև գեներալ-մայորներ Աստվածատուր Պետրոսյանն ու Արկադի Տեր-Թադևոսյանը, Երևանի շամպայն-գինիների գործարանը` Հրայր Հակոբյանի ղեկավարությամբ, Արսեն Գրիգորյանի` Մրրոյի նախաձեռնությամբ համախմբված մի խումբ արվեստագետներ` հենց ինքը` Արսեն Գրիգորյանը, Շուշան Պետրոսյանը, Նունե Եսայանը, Գոհար Հովհաննիսյանը, Ներսիկ Իսպիրյանը, Աղասի Իսպիրյանը, Ռուբեն Սասունցին, Դավիթ Ամալյանը, Մկրտիչ Մկրտչյանը (Մակիչ), Համլետ Գևորգյանը, և դեռ քանի~ հոգի ցանկություն է հայտնել աջակցելու: Նրանց թվում են Արսոն, Սամվել Երանյանը, Գագիկ Գինոսյանը, ովքեր փետրվարի հինգին պատրաստվում են մասնակցել «Ապրի՛ր առողջ» խորագրով կազմակերպվելիք բարեգործական համերգին, որի հասույթը դարձյալ կտրամադրվի Գուսան Հայկազունի բուժմանը: Ներդրում են ունեցել նաև Գաբրիել Փանոսյանը («Ազդակ» թերթի ֆոտոլրագրող), Վրեժ Սարուխանյանը (ՀՀ Առևտրաարդյունաբերական պալատի լրատվական ծառայության պետ) և Հովհաննես Գրիգորյանը («Հաճըն» հայրենակցական միության ատենապետ, «Տեսակետ» մամուլի ակումբի նախագահ), ովքեր խոստացել են, որ իրենց աջակցությունը շարունակական է լինելու:
Արկադի Տեր-Թադևոսյանի, «Մահապարտների միության» և «Հայկազունք» համույթի դիմումին արդեն արձագանքներ կան Պաշտպանության նախարարությունից, նամակ է հղվել նաև Առողջապահության նախարարություն` բուժումը պետպատվերի շրջանակներում կազմակերպելու խնդրանքով, և հուսով ենք, որ այնտեղից նույնպես շատ շուտով արձագանք կլինի: Տեղեկացանք նաև, որ նամակ է պատրաստվել` ուղղված Սամվել Ալեքսանյանին` որպես հայրենասեր պատգամավորի` «Նատալի Ֆարմ-Մալաթիա» բժշկական կենտրոնում Գուսան Հայկազունի բուժումն անվճար անցկացնելու խնդրանքով:
Ինչպես նշեցին Աստվածատուր Պետրոսյանն ու Արսեն Գրիգորյանը` սա ոչ թե պարտադրանք է, այլ բոլորիս պարտականությունը, և քանի որ բուժումը երկարատև է, բավական թանկ արժե, և հնարավոր է անգամ, որ Գուսան Հայկազունին տեղափոխեն արտասահման, ուստի նրանք դիմեցին բոլոր գործարարներին, Գ. Նազարյանի ընկերներին, բարեկամներին` իրենց օգնությունը ցուցաբերել` ներդրում անելով վերոնշյալ հաշվեհամարին: «Հայե’ր, միացե’ք»,-համախմբման կոչով դիմեց Աստվածատուր Պետրոսյանը` միասին փրկելու Գուսան Հակազունի կյանքը:
«Թող չստացվի այնպես, ինչպես Գուսան Տոտիկի դեպքում էր»,-հավելեց գեներալ-մայորը` շեշտելով, որ բուժումը հրատապ է, օգնությունն անհրաժեշտ է հե’նց հիմա, հե’նց այս պահին: Գուսան Հայկազունն ու «Հայկազունք» համույթը բազմիցս հանդես են եկել բարեգործական համերգներով, օգնել ու աջակցել են շատ-շատերի, ու այսօր, երբ օգնության կարիք ունի առողջական ու ֆինանսական ծանր վիճակում հայտնված Գագիկ Նազարյանը, մենք բոլորս մեր կարողությունների սահմաններում զորակցենք մեր սիրելի Գուսան Հայկազունին: «Մենք ունենք ուժեղ թշնամի, որի դեմ զենք-զինամթերք պետք է ունենանք, ինչը երկրորդական է, քանի որ առաջինը մարտական ոգին է»,-ասուլիսի ընթացքում նշեց Արկադի Տեր-Թադևոսյանը, իսկ մարտական ոգին առաջին հերթին բարձր են պահում հայրենասիրական երգերը: Գուսան Հայկազունը ոչ միայն խաղաղ ժամանակ, այլև հենց մարտի դաշտում է երկնել այսօր մեզանում այնքան տարածված ու սիրված բազմաթիվ նման գործեր, հիշենք թեկուզ «Գետաշենն» ու «Պիտի գնանք վաղ, թե ուշ»-ը:
Հավատում ենք և հուսով ենք, որ «Տեսակետ» մամուլի ակումբում կազմարեպված ասուլիսն էլ արձագանքներ կունենա, և բազմաթիվ այլ հայրենասեր մարդիկ նեցուկ կկանգնեն և օգնության ձեռք կմեկնեն Գագիկ Նազարյանին, նա հնարավորինս շուտ կապաքինվի ու տուն կվերադառնա, և ռազմահայրենասիրական երգերն է’լ ավելի ազդու և խրոխտ կհնչեն ու կպարգևեն մեզ նորանոր հաղթանակներ:
«Տեսակետ» մամուլի ակումբ