Փոխգնդապետ Արա Մխիթարյանին ծեծի ենթարկելը դատապարտեց պաշտպանության նախարար Դավիթ Տոնոյանը եւ հայտարարեց, որ մեղավորներն իրենց պատիժը կստանան։ Անցել է 5 ամսից ավելի, փոխգնդապետը նույն վիճակում (փակ ծանր գլխուղեղի աջ կիսագնդի միջին աստիճանի սալջարդ, աջ քունք-գագաթային, ճակատային բլթերի շրջանի սուբդորալ հեմատոմա եւ այլն) գամված է մահճակալին, նախաքննությունը տեղից չի շարժվում։ Փոխգնդապետի հայրը՝ Սամվել Մխիթարյանը, մեզ հետ զրույցում ասաց. «Գործը տեղից չի շարժվում։ Քննությունը կձգեն։ Մեկ անգամ առերեսում է եղել ու վերջ․․․ ապացուցվեց, որ ինքը հոն է եղել, դրանից հետո ոչ մի առերեսում, ոչ մի բան․․․ մենակ ուզում են մարզպետին արանքից հանեն։ 4 հոգի ասում են, որ ինքը հոն է եղել, իրենք էլի ուզում են ասել՝ չէ, մարզպետը տեխնիկայի միջոցով տանն է եղել։ Էդ սաղ աբսուրդ, մոնտաժ էրած բաներ են»։
Հիշեցնենք, որ սպայի հարազատներն ու ընկերները Արա Մխիթարյանին այդ օրը գցելու մեջ մեղադրում էին Վայոց ձորի մարզպետ Տրդատ Սարգսյանին, ոչ թե նրա օգնական Հարություն Գրիգորյանին, ում մեղադրանք է առաջադրվել դիտավորությամբ անձին ծանր մարմնական վնաս պատճառելու համար: Երեկ էլ փոխգնդապետի հայրն ասաց․ «Ինքը սուտ կխոսի (Տրդատ Սարգսյանը), ինքն ընտեղ է եղել»։ Ինչ վերաբերում է առգրավված տեսախցիկներին, ապա տուժածի հոր պնդմամբ՝ այդ տեսախցիկները դրվել են դեպքից 7 օր անց։ «Որը իրա աշխատակազմի աշխատողն է ասել, որ հետո, ով որ դրել է էդ տեսախցիկները, դրա աղջկան իրենք հետին ժամանակով ընդունել են աշխատանքի։ Ինքն էդ ժամանակ հլը մարզպետ էր, լիազորությունները վայր չէր դրել»։
Ինչ վերաբերում է որդու առողջությանը, ապա Սամվել Մխիթարյանը հայտնում է այն, ինչ ասում են բժիշկները․ «Ի՞նչ ասեմ, ասում են՝ ժամանակի ու Աստծո վրա է, էլ ոչ մի բան»։ Նշենք, որ 3 օրից՝ փետրվարի 18-ին, կլրանա 5-րդ ամիսը, ինչ Արա Մխիթարյանն այս վիճակում է։ Իսկ բժշկական աշխարհում ասում են՝ վեց ամիս կոմայի մեջ գտնվելուց հետո մարդու վերականգնումը հրաշքների շարքից է։
Տուժածի հայրն ասաց, որ մյուս կողմից որեւէ ֆինանսական աջակցության առաջարկ չի եղել, եւ փառք Աստծո, որ չեն արել․ «Ոչ մի բան պետք չէ։ Աստված ոչ անի՝ մե բան անեն, սաղին կսպանեմ»։
hraparak.am