Ապրիլյան պատերազմն իր մահաբեր ձեռքով թակեց շատերիս դռները, այդ թվում և` հաճընցիների: Հենց առաջին օրերին պատերազմի դաշտ մեկնեց «Հաճըն» հայրենակցական միության վարչության անդամ, ԵԿՄ անդամ, ազատամարտիկ, արմատներով հաճընցի մեր սիրելի ընկերն ու բարեկամը` Սուրեն Ճարատանյանը:
Ցանկանալով վիրավոր ընկերոջը դուրս հանել մարտադաշտից` նա ընկավ հերոսի մահով և անմահացավ: Ինչպես ասվում է հայտնի երգում` ևս մի արծիվ միացավ մեծ երամին: Սուրենը նահատակվեց` իր հաճընցի պապերի խրատն ու պատգամը հոգում, ա’յն հաճընցիների, որոնք ութամսյա հերոսամարտից հետո կենդանի էին մնացել ու փրկվել` իրենց սերունդներով հավերժացնելով Հաճընն ու հաճընցու անունը:
Սուրենը հաճախ էր խոսում նրանց մասին, հիշում իր պապերին և ուխտել էր լուծել նրանց վրեժը: Այսօր նա մեզ հետ չէ, բայց մեզանից հեռու է միայն ֆիզիկապես, հոգեպես մեր հարազատ ընկերն այսօր էլ մեզ հետ է, մեր մեջ, մեր սրտերում, ուստի ՀՀ նախագահի` մայիսի 28-ին Հանրապետության տոնի առթիվ նրան հետմահու շնորհած պետական բարձրագույն պարգևի առթիվ ցանկանում ենք շնորհավորել մեր հավերժ կենդանի բարեկամին:
«Հաճըն» հայրենակցական միության անդամները խմում են քո կենդանի կենացը, սիրելի’ եղբայր, մենք խոստանում ենք ավարտին հասցնել քո կիսատ թողած գործը…
«Հաճըն» հայրենակցական միություն
Ատենապետ` Հովհաննես Գրիգորյան-Ճարպիկյան
28.05.16 թ.