Փետրվարի 25-ին լրանում է մեր ազգի պարծանքի՝ Զորավար Անդրանիկի 155-ամյակը: Հոբելյանի առթիվ Տեսակետ մամուլի ակումբում հյուրընկալվել էին Չարենցի անվան գրականության և արվեստի թանգարանի տնօրեն, անդրանիկագետ Կարո Վարդանյանը և գրող, հրապարակախոս, անդրանիկագետ Ռուբեն Սիմոնյանը:
Ինչպես նշեց Կարո Վարդանյանը՝ Անդրանիկն իրեեն ձոնված երգերի թվով բացառւիկ է մեր հերոսների շարքում, բացի այդ՝ նա մեր միակ հերոսն է, որին կենդանության օրոք ժողովուրդը երգեր է ձոնել:
«Անդրանիկն ասոցացվում է ռազմական գործունեության հետ, սակայն դա այս վիթխարի լեգենդի միայն մի փոքր մասն է, նա ասպետականության, մեծահոգության, մեր ժողովրդին հատուկ բոլոր առաքինությունների խորհրդանիշն է»,-ասաց Վարդանյանը:
Նրա խոսքով՝ Անդրանիկին կարելի է համեմատել միայն Մաշտոցի ու Կոմիտասի հետ:
Վարդանյանը նշեց. «Շահան Շահնուրն ասում էր՝ մեր ազգը 1000 տարվա մեջ ավելի մեծ բան չի ունեցել, քան Մաշտոցը, Կոմիտասը, եկեղեցին ու Անդրանիկը»:
«Անդրանիկ Զորավարի մեծությունը չի տեղավորվում այն մտածողության մեջ, որը հայերն ու օտարներն ունեցել են նրա մասին, Անդրանիկը հենց սկզբից առասպել է եղել, ժողովուրդն է նրան այդպիսին դարձրել: Անդրանիկը և՛ ռազմի դաշտում, և՛ հոգևոր դաշտում եղավ առաջնորդ և հուսախաբ չարեց իր ժողովրդին»,-նշեց Ռուբեն Սիմոնյանը:
Նա հիշեց Զորավարի խոսքերն այն ժամանակ, երբ Հյուսիսային Կովկասում նրան մեծ գումար են տվել՝ ասելով, որ մի մասը թող բարեգործության համար օգտագործի, մյուսն էլ՝ անձամբ իր. Անդրանիկը պատասխանել է, որ իր թե՛ կյանքը, թե՛ դրամը իր ժողովրդինն են:
Սիմոնյանի խոսքով՝ այն բանի համար, որ մենք այսօր Սյունիք ունենք, պարտական ենք Անդրանիկին: «Անդրանիկից հետո եկած հերոսները Անդրանիկի սարքած օրորոցից են դուրս եկել»,-անդրանիկագետը պատկերավոր կերպով այսպես նկարագրեց հյուսն Զորավարի գործունեությունն ու մեծությունը:
Նա ասուլիսի ընթացքում ներկայացրեց նաև ընդամենը օրեր առաջ լույս տեսած իր գիրքը՝ Զորավարի մասին, որը կոչվում է «Օտարները Անդրանիկի մասին»: Սիմոնյանն ասաց, որ այստեղ կան լուսանկարներ, որոնք հրապարակվում են առաջին անգամ:
Ամփոփելով ասուլիսը՝ Կարո Վարդանյանն էլ նշեց, որ Անդրանիկը մեր ազատագրական շարժումների ողնաշարն էր:
Մանրամասները՝ տեսանյութում