«Առանց կոնֆլիկտի ընտանիք չկա»,- «Տեսակետ» ակումբում այսպես սկսեց մամուլի ասուլիսը ԵՊԲՀ Սեքսոլոգիայի ամբիոնի դոցենտ, բ. գ. թ., սեքսոպաթոլոգ, հոգեթերապևտ Մարատ Զաքարյանը՝ խոսելով ընտանեկան կոնֆլիկտների մասին:
Նա նշեց, որ եթե որևէ ընտանիքում կոնֆլիկտ չի լինում, նշանակում է՝ այդտեղ տան անդամներն իրար սառն են վերաբերվում, շփում չկա, մեկը մյուսից անջատ հարաբերությունների մեջ է:
Ըստ բանախոսի՝ ընտանեկան կոնֆլիկտների պատճառները բազմաթիվ են, դրանք պայմանավորված են նաև տվյալ ազգի առանձնահատկություններով, մեծ նշանակություն ունեն էթնիկ հարցերը, հնուց եկող ադաթները, ինչպես նաև՝ մարդկանց կրթական ցենզը:
Զաքարյանի խոսքով՝ կոնֆլիկտային իրավիճակները խորը արմատներ ունեն՝ հոգեկան, հոգեբանական, կոնֆլիկտները մարդու ցանկությունների և իրական հնարավորությունների տարբերություններն են:
Զույգի աններդաշնակությանը կարող են հանգեցնել սոցիալ-հոգեբանական պատճառները, անըմբռնելիությունը, երբ, հոգեթերապևտի խոսքով, չեն կարող իրար հետ լեզու գտնել և այլն: Պատճառներից մեկն էլ ֆինանսական խնդիրն է:
Ինչպես նշեց Մարատ Զաքարյանը՝ ամուսնական զույգերի կոնֆլիկտների հիմքում կարող է լինել նաև տարիքային տարբերությունը՝ հայացքների ոչ համապատասխան լինելու առումով:
Բժիշկն ընտանեկան կոնֆլիկտների և որպես դրանց հետևանք՝ ամուսնալուծությունների համատեքստում անդրադարձավ նաև այդ ընտանիքում եղած երեխաների խնդիրներին:
«Մտավոր նորմալ չեն զարգանա այն երեխաները, որոնց ընտանիքներում խնդիրներ կան: Այդ դեպքերում մենք միշտ խորհուրդ ենք տալիս վեճերի ժամանակ առանձնանալ, իրար մեջ լուծել հարցերը՝ երեխաների բացակայությամբ»,-ասաց նա:
Ի դեպ՝ Զաքարյանը նշեց նաև, որ այն ընտանիքներում, որտեղ շատ երեխաներ կան, կոնֆլիկտները սովորաբար ավելի քիչ են լինում, և խոսքն այստեղ, ըստ նրա, ամենևին էլ սառը վերաբերմունքի կամ շփում չունենալու մասին չէ:
Ցանկացած խնդրի դեպում Մարատ Զաքարյանը խորհուրդ տվեց անպայման դիմել մասնագետի, քանի որ, նրա խոսքով, ամեն իրավիճակից ելք կա: «Մարդու ցանկությունն է՝ գտնել ելքը, թե ոչ»,-նշեց նա և հստակեցրեց, որ կոնֆլիկտային իրավիճակում բոլոր պարագաներում ճիշտը երկու կողմին լսելն է՝ զույգի խնդրին իրական լուծում առաջարկելու համար:
Մանրամասները՝ տեսանյութում.