Ժողովրդավարական առողջ համակարգը պայմանավորված է կայացած քաղաքացիական հասարակության առկայությամբ։ Քաղաքացիական հասարակության ժամանակակից ընկալումներում, պետական իշխանության կառույցներից և քաղաքական կուսակցություններից բացի, հանրային կյանքի կազմակերպման ու կառավարման գործընթացներում կարևոր առաքելություն են իրականացնում նաև կամավորության և շահերի ընդհանրության սկզբունքով ձևավորված, ինքնավարության սկզբունքով գործող ոչ կառավարական հասարակական կազմակերպությունները։
Հենց այս առաքելությամբ «Իրավունքի ուժ» իրավապաշտպան ՀԿ-ն հիմնադրվեց 2016թ. դեկտեմբերին՝ ձեռնմուխ լինելով զբաղվել մարդու իրավունքների պաշտպանությամբ, կանանց տնտեսական զորեղացմամբ, դատական նիստերի լուսաբանման ազատության կիրառմամբ, դատաիրավական բարեփոխումների ծրագրերի իրականացմամբ, ինչպես նաև պետական մարմինների հետ ակտիվ համագործակցությամբ։
Կազմակերպության յուրահատկություններից մեկը ոչ հիերարխիկ գործելաոճն է՝ օրինակ հանդիսանալով նաև մյուս ՀԿ-ների համար, որպեսզի նրանք էլ ղեկավարեն կազմակերպությունը այս ձևաչափով։ Երեք տարիների ընթացքում կազմակերպությունը պայքարել է մարդու ոտնահարված իրավունքների վերականգման, կանանց տնտեսապես անկախ դարձնելու և դատաիրավական բարեփոխումների առաջարկությունների փաթեթ ներկայացնելու ուղղությամբ։ Շնորհիվ «Իրավունքի ուժ» ՀԿ-ի՝ Գեղարքունիքի մարզի Գավառ քաղաքում մի քանի շահառու կանայք արդեն հիմնել են իրենց փոքրիկ բիզնեսները՝ դառնալով տնտեսապես անկախ։
Կազմակերպությունը համագործակցում է նաև Բարձրագույն դատական խորհրդի, Աշխատանքի և սոցիալական հարցերի նախարարության հետ։ Կազմակերպության ռազմավարական պլանում առկա են նաև համագործակցության նոր հեռանկարներ Սփյուռքում գործող մշակութային, բարեգործական միությունների, ինչպես նաև անհատ բարերարների հետ։