Կորոնավիրուսը բուժելի է, թեև շատ արագ և մեծ շառավղով է տարածվում: Այս մասին լրագրողների հետ հանդիպմանը հայտարարեց «Մեկ առողջություն» կոալիցիայի ղեկավար Գրիգոր Գրիգորյանը:
Հարցին՝ մարդու առողջության համար կորոնավիրոսը վտանգավո՞ր է, թե՞ ոչ, Գրիգորյանը նշեց՝ վտանգավոր է: «Առողջապահության համաշխարհային կազմակերպությունն արդեն իսկ կորոնավիրուսը դասել է «Բ» խմբի վարակիչ հիվանդությունների շարքին, որոնք վտանգավոր ինֆեկցիոն հիվանդություններն են: Այն շատ արագ և մեծ շառավղով է տարածվում է՝ ախտահարելով մեծ թվով մարդկանց՝ կարճ ժամանակահատվածում»,-ասաց նա:
Վերջինս միևնույն ժամանակ ընդգծեց՝ խուճապի մատնվելու կարիք չկա, քանի որ դեպքերի մեծամասնությունում հիվանդությունն անցնում է որպես միջին ծանրության ռեսպիրատոր հիվանդություն, և պարզ կանոններին հետևելու դեպքում հնարավոր կլինի խուսափել հիվանդության տարածումից:
Ըստ Գրիգորյանի՝ հիմնավոր չեն նաև այն դիտարկումները, թե կորոնավիրուսով երեխաները չեն վարակվում: Ըստ «Մեկ առողջություն» կոալիցիայի ղեկավարի՝ երեխաների վարակման դեպքեր ևս կան, հետևաբար դպրոցների և ուսումնական այլ հաստատությունների փակումը արդարացված որոշում է:
Անդրադառնալով մի շարք պաշտոնայների հայտարարություններին, թե կորոնովիրուսի դեպքում կարանտինը արդարացված և էֆեկտիվ միջոց չէ, Գրիգորյանը հայտարարեց, թե այդ դիտարկումները սխալ են: «ԱՀԿ փորձագետները միահամուռ եկել են այն եզրակացությանը, որ եթե Չինաստանում ստիպողական կարանտին չլիներ, տարածումն ու զոհերը լինելու էին շատ ավելի»,-նշեց նա:
Անդրադառնալով դիմակների արդյունավետությանը՝ Գրիգոր Գրիգորյանը նշեց, թե փակ տարածքներում դիմակ կրելը կարող է որոշակիորեն արդյունավետ լինել: