Իսպանիայում դատական գործընթացի ժամանակ օրենքով գող Տարիել Օնիանին խոսել է այն մասին, թե ինչ դերակատարում է ունեցել Իոսիֆ Ստալինն օրենքով գողերի ոչնչացման հարցում: Այս մասին հայտնում է Ռոսբալթը:
Երբ դատախազն Օնիանիին անվանել է օրենքով գող, վերջինս խոսել է այդ տերմինի պատմության մասին: Նրա խոսքերով օրենքով գողերը երևան են եկել բոլշևիկների ժամանակ: Այդ տերմինով անվանել են քրեական աշխարհի ներկայացուցիչներին, ովքեր օգնել են տապալել կայսրերի իշխանությունը:
Այն բանից հետո, երբ Ստալինը հասել է իր նպատակին, ոչնչացրել է թագավորական ընտանիքը, օրենքով գողերի գոյությունը դարձել է անիմաստ: Տարոն հայտարարել է, որ այդ ժամանակներից օրենքով գողեր գոյություն չունեն:
Հայտնի օրենքով գողը միֆ է անվանել կութաիսյան հանցավոր խմբի գոյությունը, որի ղեկավարը հանդիսանում է հենց ինքը: Քրեական գործերում նշվում է, որ Տարոն այդ խմբավորման քրեական գեներալն է:
***
Տարիել Օնիանին համարվում է քրեական աշխարհի «գեներալներից» մեկը, իր ազդեցությամբ չզիջելով Յապոնչիկին, Դեդ Հասանին և քրեական աշխարհի այժմ գործող այլ հեղինակություններին:
Օնիանին ծնվել է 1952 թ.-ին Արևմտյան Վրաստանում և «քութայիսյան» հանցավոր խմբավորման ներկայացուցիչ է, որը քրեական աշխարհում համարվում է ամենազդեցիկ կլաններից մեկը:
Առաջին անգամ Տարոն դատապարտվել է 17 տարեկան հասակում, իսկ ընդհանուր առմամբ նրա դատվածությունների թիվը հասնում է 8-ի:
Այդպիսի քրեական անցյալով և կենսագրությամբ նրա համար մեծ դժվարություն չի եղել «օրենքով գող» կարգվել:
Նա համարվում էր 1980-1990-ական թթ.-ի Մոսկվայի ամենաազդեցիկ «օրենքով գողը» և որոշ տեղեկություններով, լավ հարաբերությունների մեջ էր գտնվում նաև ռուս «օրենքով գողերի» հետ:
Ըստ որոշ տեղեկությունների՝ Տարոյի կարողությունը հասնում է 400 միլիոն դոլարի, իսկ «քութայիսյան» խմբավորման անդամների թիվն անցնում է 500-ից:
1990-ական թթ.-ին Մոսկվայի վրացական մաֆիայի կնքահայրը տեղափոխվում է Փարիզ, այնուհետև՝ Իսպանիա:
Եվրոպայում Տարոն զբաղվում է շինարարական բիզնեսով և որոշ տեղեկություններով, որոնք հետագայում անընդհատ հերքվել են, տիրապետել է վրացական «Աէրզենա» ավիաընկերության մասնաբաժինների մեծ մասին:
2005 թ.-ին իսպանացի իրավապահները իրականացրել են «Մեղու» հատուկ գործողությունը, որի նպատակն էր ձերբակալել քրեական աշխարհի պարագլուխներին` Բարսելոնում, Ալիկանտեյում և Մերբելեյում:
Օնիանիին այդ ժամանակ հաջողվում է փախչել, սակայն ոստիկանների ձեռքում է հայտնվում նրա 12-ամյա դուստրը:
Տարոն այդ պահից սկսած «Ինտեռպոլի» կողմից հայտարարվում է միջազգային հետախուզման մեջ:
2009 թ.-ին Ռուսաստանի հատուկ ծառայությունները ձերբակալում են Տարոյին Մերձմոսկվայի էլիտար «Գորկի-2» թաղամասում:
2010 թ.-ին Մոսկվայում մահափորձ է կատարավում «օրենքով գող» Ասլան Ուսոյանի` Դեդ Հասանի նկատմամբ և ԶԼՄ-ներում հայտնված տեղեկությունների համաձայն՝ այդ մահափորձը Տարոյի և Հասանի հին հակամարտության արձագանքն է հանդիսացել:
2010 թ.-ին քրեական աշխարհի լեգենդ Տարոն դատապարտվում է 10 տարի ազատազրկման, իսկ 2011թ.-ի սեպտեմբերի 16-ին ռուսական կողմը Իսպանիայի խնդրանքով, Տարոյին հանձնում է այդ երկրի իրավապահ մարմիններին: