Արամ Վարդանյանի (Վստրեչի Ապեր) փաստաբան Երվանդ Վարոսյանը զարմացել է, երբ տեղեկացել է, որ իր պաշտպանյալի տանը տեղի ունեցած միջադեպն ինչ-որ քրեական գործի շրջանակներում է եղել։
«Եթե խոսվում է քրեական գործի շրջանակների մասին, ուրեմն ոստիկանությունը պետք է գործեր քրեական դատավարության օրենսգրքի շրջանակներում։ Եթե որևէ անձի են փնտրում, այդ անձին կարող են հրավիրել, դրա կարգը ես չէ, որ պետք է իրենց բացատրեմ։ Եթե խոսքը վերաբերում է Արամ Վարդանյանին, ապա իրենք քաջատեղյակ են, որ բազմաթիվ անգամներ, հատկապես՝ վերջին ժամանակահատվածում, Արամ Վարդանյանը տարբեր կերպ ոստիկանություն հրավիրվել է՝ գրավոր, բանավոր, և չի եղել որևէ դեպք, որ չներկայանա։ Նման պարագայում երեկվա տեղի ունեցած գործողությունները որևէ տրամաբանության մեջ չեն տեղավորվում», – Արամ Վարդանյանի տան բակում հրավիրված մամուլի ասուլիսին հայտարարեց փաստաբան Երվանդ Վարոսյանը։
Նա ասաց, որ իրենք՝ փաստաբանները, երեկ երեկոյան հանդիպել են Վարդանյանի հետ, որևէ խնդիր չի եղել։
«Նման ապօրինություն ես երբեք չեմ տեսել, սա ապօրինություն չէր, սա վայրագություն էր։ Երբ մտա այս տուն և բարձրացա երկրորդ հարկ, տեսա, որ ննջարանում Արամ Վարդանյանի 5 տարեկան թոռը՝ աղջիկ երեխա, մոր գրկում դողում է, իսկ ննջարանում դիմակավորված ու զենքերը բաց վազվզող ոստիկաններ, դա ուղղակի զարհուրելի էր», – լրագրողներին պատմեց Վարոսյանը։
«Երեխան այդ իրադարձություններից հետո չի խոսում», – իր հերթին ասաց Վարդանյանի փաստաբան Լուսինե Սահակյանը։
Երվանդ Վարոսյանն էլ նշեց, որ Արամ Վարդանյանի տնից բերման են ենթարկել 3 մարդու։
«Բերման են ենթարկել նաև այլ անձանց, որոնց մի մասն ազատ է արձակվել։ Երկու հոգի էլ ձերբակալվել են ակնհայտ ապօրինի, հորինված մեղադրանքով», – ասաց Վարոսյանը։