Չինաստանի ԱԳՆ-ը աշխարհում կորոնավիրուսի տարածման համար արդարանալու որեւէ հիմք չի տեսնում, թեեւ այն առաջին անգամ գրանցվել է չինական Ուհան քաղաքում։ Այսպես է երկրի արտաքին քաղաքական գերատեսչության ներկայացուցիչ Չժաո Լիցզյանը հինգշաբթի օրը ճեպազրույցում մեկնաբանել է Fox News հեռուստաալիքի քաղաքական մեկնաբան Ջեսի Ուոթերսի կարծիքն այն մասին, որ Պեկինին անհրաժեշտ է ներողություն խնդրել կորոնավիրուսի բռնկման համար, հայտնում է ՏԱՍՍ-ը։
«Կորոնավիրուսը մարդկության ընդհանուր թշնամին է, դրանից տառապում են շատ երկրների բնակիչներ։ Այն կարծիքը, որ Չինաստանը պետք է ներողություն խնդրի, բացարձակ մերկապարանոց է եւ անհիմն»,- նրա խոսքերն է մեջբերում ՉԺՀ ԱԳՆ կայքը։
Լիցզյանը նաեւ ընդգծել է, թե «Առողջապահության համաշխարհային կազմակերպությունը բազմիցս հայտարարել է, որ երկրներին եւ մարդկանց սեւացնելը իր մեջ ավելի մեծ վտանգ է պարունակում, քան վիրուսն ինքը»։ «Տվյալ պահին կորոնավիրուսի ծագումը դեռ պարզված չէ, եւ կարեւոր չէ, թե որտեղ է այն հայտնվել։ Ինչպես Չիանստանը, այնպես էլ մյուս երկրները նրա զոհն են դարձել եւ համատեղ դիմակայում են նրա տարածման սպառնալիքին»,- նշել է Չժաո Լիցզյանը։
«2009թ․ ԱՄՆ-ում խոզի գրիպի բռնկումից աշխարհի 214 երկրներում եւ տարածաշրջաններում ավելի քան 18 000 մարդ մահացավ։ Խնդրե՞ց այն ժամանակ որեւէ մեկը Վաշինգտոնին ներողություն հայցել»,- հավելել է Չինաստանի ԱԳՆ ներկայացուցիչը։