«Ատենապե՛տ ախպեր, ե՞րբ ես ինձ պատվավոր անդամի կոչում տալիս»,-«Հաճըն» հայրենակցական միության ատենապետ Հովհաննես Գրիգորյան-Ճարպիկյանին երբեմն կատակով հարցնում էր Միության վարչության անդամ, արմատներով հաճընցի, ազատամարտիկ, Երկրապահ կամավորների միության անդամ Սուրեն Ճարատանյանը:
Արդեն երկու տարի է անցել, սակայն կարծես երեկ էր, երբ ազատամարտիկը, անսալով հայրենի հողի կանչին, որպես կամավոր մեկնեց Արցախ՝ շարունակելու կիսատ թողած գործը, և անմահացավ… Ինքն էլ էր վատառողջ (երկու անգամ սրտի վիրահատություն էր տարել), կինն էլ: Կինը հիվանդանոցում էր: Գնաց, բժիշկներին հարցուփորձ արեց, պարզեց, որ տիկնոջ հետ ամեն ինչ լավ կլինի, ու հանգիստ սրտով գնաց՝ միանալու գիտակցված մահվան ճիրանները նետված քաջորդիների երամին:
Հ. Գրիգորյան-Ճարպիկյանի բնորոշմամբ՝ Սուրենը չափազանց նուրբ հումոր ուներ, ազնիվ էր ու ճշմարտախոս, օժտված էր հաճընցիներին բնորոշ համարձակությամբ ու խիզախությամբ: «Նա իսկապես ապրում էր իր նախնիների հուշերով, օր չկար, որ իր հաճընցի տատիկ-պապիկներին չհիշեր, չմեջբերեր նրանց խորիմաստ խոսքերը, չպատմեր Ճարատանյանների մեծ ու հայտնի գերդաստանի մասին»,-նշում է Միության ատենապետը:
Ըստ նրա՝ ազատամարտիկը լավատես էր ու հաճախ էր քաջալերում իրեն. «Անգամ երբ ինչ-ինչ պատճառներով խիստ նեղված էի լինում, միշտ ոգևորում էր ինձ, ու հավատում էի, որ ամեն ինչ լավ կլինի: Նա իմ ընկերն էր, նա իմ ուժն էր…»:
«Սուրենն ուրախացել էր, որ Նոր Հաճընում եկեղեցի է կառուցվել, որոշել էինք մատաղ անել այդ առիթով. չհասցրեցինք…»,-պատմում է պարոն Գրիգորյան-Ճարպիկյանն ու հավելում. «Նա անցել էր Արցախյան ազատամարտի բովով և բարձր գնահատականների ու շքանշանների արժանացել, բայց այնքան համեստ էր, որ անձամբ իրենից երբեք չէիր իմանա այդ մասին: Երկար տարիներ աշխատում էր Մետրոպոլիտենում, որտեղ բոլորն իրեն շատ էին սիրում, սիրված ու գնահատված էր թե՛ ընտանիքում, թե՛ ընկերական շրջապատում: Սուրենն իր պարկեշտությամբ, ճիշտ դաստիարակությամբ ողջ կյանքն ապրեց ու գործեց հանուն հայրենիքի, որի իսկական նվիրյալն էր»:
Գարեգին Նժդեհն ասել է. «Հայրենիք մի սպասեք օտարից և ճակատագրից, եթե դա ձեր արյունով պաշտպանելու չափ հայրենասեր չեք»: Սուրեն Ճարատանյանն այդպիսի՛ն էր, և ահա արդեն երկրորդ տարին է, ինչ նա ճախրում է անմահության երկնակամարում…
Ամալյա Հովհաննիսյան