«13–ամյա երեխան այս պահին դեռ անգիտակից վիճակում է։ Այս մասին այսօր՝ մարտի 6–ին, լրագրողների հետ զրույցում ասաց «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանն՝ անդրադառնալով երեկ Գյումրիում ծեծի ենթարկված 13–ամյա աղջկան, որին գիշերն են տեղափոխել Երեւան։
Դալլաքայնի խոսքով՝ Գյումրիում կատարվել են անհրաժեշտ բժշկական միջամտությունները։ Բուժման եւ հետազոտման մեթոդներից եւ երեխայի վիճակի կայունանալուց հետո են միայն տեղափոխել Երեւան, եւ որ այս պահին երեխայի մոտ արյունահոսություն չկա, բայց առկա են բազմաթիվ տրավմաներ. «Երեխան ունի ծանր զուգակցված բազմակի տրավմա, գլխուղեղի փակ տրավմա, սալջարդ ուղեղի այտուց, ունի արյունազեղում, քթի բազմակի ոսկորների կոտրվածք, ծնոտի կոտրվածք, անրակի կոտրվածք, 10-րդ կողի կոտրվածք, մարմնի բազմակի սալջարդեր՝ ոևրովայնի սալջարդ, կրծքավանդակում արյան կուտակում»։
Դալլաքյանի խոսքով՝ երեխան ընդունվել է ծանր՝ անգիտակից վիճակում. «Եղել է կասկած, որ ներքին արյունահոսություն կա եւ այլ ներքին օրգանների վնասում, սակայն աղիքի մասնահատման կամ այլ մեծ վնասումներ, որոնք պահանջեին ավելի ծանր, լուրջ քայլեր, փառք Աստծո չեն եղել։ Երեխայի մոտ այսօր գերակշռողը գանգուղեղային տրավման է։ Այս պահին դեռ որեւէ կրկնակի միջամտությունների կարիք չենք գտնում»։
Լրագրողների հարցին, հարազատներից, որեւէ մեկը եկե՞լ է աղջկան տեսակցելու, բժիշկը պատասխանեց կարճ. «Դեռ ոչ»։
Հաջորդ հարցին՝ հասված հարվածները երեխայի կյանքին վտանգ սպառնո՞ւմ են, բժիշկը պատասխանեց. «Հենց առաջին վայրկյանից երեխայի մոտ եղել է բազմակի ծանր վնասվածքներ, որոնք ինչ խոսք հանդիսանում են լուրջ վնասվածքներ եւ հիմա իր գանգուղեղային տրավման եւս բավականին լուրջ մտահոգվելու տեղիք է տալիս»։
Հարվածները եղել են ձեռքով, թե՞ որեւէ առարկայով, Դալլաքյանը պատասխանեց. «Ավելի շատ բութ վնասվածքներ են, ձեռքով, թե իրով, դա դատաբժշկական փորձաքննության խնդիր է»։
Հիշեցնենք, որ երեկ Գյումրիում ողբերգական դեպք է տեղի ունեցել. ոստիկանները հայտնաբերել են 43-ամյա կնոջ դին եւ իր 13-ամյա դստերը՝ ծայրահեղ ծանր վիճակում. հանցագործությունը կատարելու կասկածանքով բերման է ենթարկվել 28-ամյա երիտասարդ։
Հարուցվել է քրեական գործ՝ ՔՕ-ի 112 հոդվածի 2-րդ մասի 1-ին եւ 14-րդ կետերի հատկանիշներով՝ դիտավորությամբ առողջությանը ծանր վնաս պատճառելը երկու կամ ավելի անձանց նկատմամբ՝ անզգուշությամբ առաջացնելով տուժողի մահ: