«Ես աջակցության կարիք ընդհանրապես չեմ ունեցել, չունեմ և երբեք չեմ ունենալու։ Ընդամենը 72 ժամ եմ եղել անազատության մեջ»,- խորհրդարանում լրագրողների հետ զրույցում ասաց ԱԺ «Իմ քայլը» խմբակցության պատգամավոր Հայկ Գևորգյանը՝ անդրադառնալով Արամ Վարդանյանի (Վստրեչի Ապեր) հայտարարությանը, թե ժամանակին, երբ Նիկոլ Փաշինյանը և Հայկ Գևորգյանը անազատության մեջ են եղել, օգնել է նրանց և նրանց ընտանիքներին:
Գևորգյանի խոսքով, իրեն անազատության մեջ գտնվելու 72 ժամվա ընթացքում ընդհանրապես հեռախոս պետք չի եղել։ Նա նշեց, որ իրեն անազատության ընթացքում որևէ մեկը «չի նեղել», այլ ընդհակառակը՝ հրաշալի 3 օր է ունեցել՝ մենակ կերել և քնել է։ Նա կատակեց, որ շնորհակալություն է հայտնել Վլադիմիր Գասպարյանին, որ իրեն 3 օր արձակուրդ է տվել։
«Ես ոչ մեկից երբեք օգնություն չեմ խնդրել, աջակցություն չեմ խնդրել, ինձ աջակցել են իմ պաշտպանները: Բացարձակապես այլ օգնություն չեմ փորձել ստանալ, օգնության կարիք պիտի ունենային նրանք, ովքեր էդ գործը սարքել էին, անհաջող փնթի ձևով գործ էր սարքվել, որ իբր ես վրաերթ էի արել»,-ասաց նա:
Անդրադառնալով Վարդանյանին պատկանող տարածքում իրավապահների գործողությունների համաչափության խնդրին՝ Հայկ Գևորգյանն ասաց, որ դրա մասին պիտի հարցնել մասնագետներին, ինքը չի կարող գնահատական տալ:
Հարցին՝ ինչպես է վերաբերվում հայտարարություններին, որ իրավապահների վերջին գործողությունները շոու են, Գևորգյանը պատասխանեց՝ եթե ուզենայինք աղմուկ անել, մի 500 հոգու հենց հիմա կբռնեինք։