Մարտի 5-ին Գյումրիում դաժան ծեծի հետևանքով մահացած կնոջ՝ Մ. Խ.-ի հուղարկավարությունը տեղի կունենա վաղը, ժամը 12:00-ին՝ «Շիրակ» գերեզմանատանը: Այդ մասին ԳԱԼԱ-ին փոխանցեցին Գյումրու քաղաքապետարանից:
Նշենք, որ 43-ամյա կնոջ մարմինը մի քանի օր է գտնվում էր դիահերձարանում, նրա հարազատները հրաժարվել են սպանված կնոջը հուղարկավորելուց:
Հիշեցնենք, որ մարտի 5-ին Գյումրիում ծեծի էին ենթարկվել մայրն ու նրա անչափահաս դուստրը. կինը մահացել էր, իսկ 13-ամյա աղջիկը ծայրահեղ ծանր վիճակում, մարմնական տարբեր վնասվածքներով տեղափոխվել էր «Գյումրու մոր և մանկան ավստրիական հիվանդանոց»: Այնուհետ նա տեղափոխվել է Երևան։
Աղջիկն ունի համակցված վնասվածքներ, գլխուղեղի, կրծքավանդակի, որովայնի սալջարդ, կոտրվածքներ։ Վիճակը շարունակում է մնալ ծայրահեղ ծանր:
***
ԱԺ «Լուսավոր Հայաստան» խմբակցության անդամ Սրբուհի Գրիգորյանը ֆեյսբուքյան իր էջում հայտնել է, որ այսօր պատգամավոր Մանե Թանդիլյանի հետ այցելել է Գյումրիում ծեծված երեխային:
«Ապաքինման առումով դրական դինամիկա կա: Արդեն խոսում է, հումորն էլ՝ տեղը …
Հորաքրոջն է ուզում տեսնել …Այտուցները սկսել են լավանալ: Ձախ կիսագնդի հետ կապված խնդիրն է հիմա անհանգստացնում: Ձախ կողմը թույլ է: Ես հույս ունեմ, որ աղջնակը հաղթահարելու է, ոտքի է կանգնելու…Կապ կպահենք բժիշկների հետ, կփորձենք կապ պահել նաև հարազատների հետ….
Աստված օգնական աղջնակին…
Բոլորս անելիք ունենք, որ նման դեպքերը բացառվեն մեր երկրում… Ինձ մյուս երկրների վիճակագրությունը չի հետաքրքրում… Չեն հետաքրքրում նաև անիմաստ քննադատությունները ծեծից մահացած կնոջ հասցեին…
Սա խնդիր է, որն առկա է և պետք է լուծում ստանա»,- գրել է Գրիգորյանը: