Մարդկային զարգացման միջազգային կենտրոնի ղեկավար Թևան Պողոսյանն առաջարկում է, որ փոխվարչապետի մակարդակով ստեղծվի տեղեկատվական շտաբ, որը կկանոնակարգի կորոնավիրուսի հետ կապված յուրաքանչյուր տեղեկություն: Այս մասին Պողոսյանն ասաց «Տեսակետ» մամուլի ակումբում ասուլիսի ժամանակ՝ անդրադառնալով Հայաստանում կորոնավիրուսի նոր դեպքերի հաստատմանը և դրա հետ կապված մեր անելիքներին:
Բանախոսի կարծիքով՝ շտաբը պետք է պարբերաբար տեղեկություններ հաղորդի կորոնավիրուսի տարածման, արվող կանխարգելիչ միջոցառումների մասին, որպեսզի հանրությունը ճիշտ տեղեկություններ ստանա՝ իրազեկվելով մեկ աղբյուրից, այլ ոչ տարբեր սոցկայքերից:
«Լավ կլիներ, որ կենտրոնացված օպերատիվ շտաբ ձևավորվեր, տրանսպորտային միջոցներն ախտահանվեին, ինչպես նաև՝ մենք ինքներս հոգատար լինեինք ինչպես մեր, այնպես էլ՝ դիմացինի հանդեպ»,-ասաց նա:
Պողոսյանի խոսքով՝ սա նույնպես անվտանգության խնդիր է մեզ համար, ինչպես, օրինակ, Արցախի հարցը:
Բանախոսն ասաց, որ Արցախի հարց ասելով՝ իր համար հիմա առաջնայինը չորս կետեր են: «Իմ պատկերացմամբ՝ երբ Հայաստանն ասում է, որ Արցախի անվտանգության երաշխավորն է, պիտի այնպիսի դեր ունենա, որ ընտրություններից հետո Արցախը հզորացած լինի, և բոլորս ընտրությունների արդյունքի իմաստով հպարտանանք:
Հիշեցնենք, որ մարտի 31-ին Արցախում ինչպես օրենսդիր, այնպես էլ՝ գործադիր իշխանության ընտրություններ են անցկացվելու:
Թևան Պողոսյանն անդրադարձավ Արցախի ընտրությունների թեկնածուների՝ մեկը մյուսին սևացնելու, ոչ թե ծրագրերը, այլ անձերին քննարկելու անթույլատրելիությանը:
Նա նշեց նաև, որ չպետք է մոռանանք, որ թեև հիմա Արցախում քարոզարշավ է ընթանում, բայց, միևնույն ժամանակ, Ադրբեջանի ներքին իրադարձությունները, հռետորաբանության ուժեղացումը տանում են նրան, որ սրացումներ են լինում Տավուշի սահմանին, Նախիջևանի գոտում, և դա հեշտությամբ կարող է տեղափոխվել հենց Արցախ:
Պողոսյանը կարևորեց նաև այն գիտակցումը, որ մեր ներքին յուրաքանչյուր սրացում կարող է կործանարար ազդեցություն ունենալ:
Ինչ վերաբերում է Ղարաբաղի այսպես կոչված «ադրբեջանական համայնքի» ներկայացուցիչների հանդիպումներին՝ Պողոսյանն ասաց. «Ժամանակն է եկել, որ մենք բարձրաձայնենք դրա անթույլատրելիությունը: ԵԱՀԿ ՄԽ համանախագահները պիտի զգան իրենց դեսպանների արած սխալը»:
Նա նշեց, որ իրեն այնքան էլ չի հետաքրքրում, թե ինչ են քննարկել հանդիպման ժամանակ, քանի որ ամեն դեպքում պետք է պատրաստ լինել խափանելու նրանց ծրագրերը: «Արցախի հարցը լուծվում է հողի վրա, բանալին էլ մեր ձեռքում է»,-եզրափակեց բանախոսը:
Մանրամասները՝ տեսանյութում