Իտալիայից Հայաստան ժամանած կորոնավիրուսով հիվանդ քաղաքացին ոչ միայն պետությունից է թաքցնում ջերմություն ունենալու հանգամանքը, այլև այս ընթացքում սիստեմա է ընդունում և կոպիտ ասած սիստեմայի տակից դուրս գալով՝ վճռական որոշում է կայացնում՝ մասնակցելու հարազատի նշանադրության արարողությանը։ Ֆեյսբուքյան ուղիղ եթերի ժամանակ այս մասին ասաց ՀՀ վարչապետ Նիկոլ Փաշինյանը՝ անդրադառնալով Իտալիայից ժամանած կորոնավիրուսով վարակված ՀՀ քաղաքացուն, ով Էջմիածնում մարտի 8-ին մասնակցել է նշանադրության արարողության։
«Այս ընթացքում շփվում է վարսավիրի հետ, ոսկերիչի հետ և ի վերջո գնում է նշանադրության արարողությանը, որին բազմաթիվ մարդիկ են մասնակցում։ Ըստ էության՝ ունենում ենք այսպիսի ճգնաժամային իրավիճակ, երբ նրա մորաքրոջ տղան և ամուսինն արդեն հաստատապես վարակված են, իսկ նշանադրության մասնակիցները, այդ թվում վարսավիրներն ու ոսկերիչը՝ մեկուսացված»,-նշեց վարչապետը։
Վարչապետն ընդգծեց, որ կանխարգելելու միակ հնարավորությունն անհատական պատասխանատվությունն է։ Նիկոլ Փաշինյանը նշեց՝ պետական կառավարման մարմինները կարող են բազմաթիվ միջոցառումներ ձեռնարկել, բայց եթե մարդը շատ ուզում է այդ միջոցները շրջանցել, ապա շրջանցելու ձևը կգտնի։
Իսկ թե սիստեմա ընդունելիս բժիշկներըինչպես չեն կարողացել նրա մոտ ախտորոշել հիվանդությունը՝ վարչապետը չի մանրամասնել։