Եվրոպական երկրներում մոտակա ժամանակները կորոնավիրուսի հետևանքով մահացության մակարդակը կաճի, քանի որ շատ երկրներ դեռևս գտնվում են համաճարակի տարածման սկզբնական փուլում: Այս մասին РИА Новости գործակալության հետ զրույցում հայտարարել է Առողջապահության համաշխարհային կազմակերպության պաշտոնական ներկայացուցիչ Թարիք Յազարևիչը:
«Համաճարակի բռնկումը Իտալիայում զարգացել է ավելի երկար ժամանակ, քան Եվրոպայի այլ երկրներում, այդ իսկ պատճառով ավելի շատ հիվանդներ կամ դուրս կգրվեն կամ կմահանան: Այլ եվրոպական երկրներում, որտեղ համաճարակի բռնկումը գտնվում է ավելի վաղ շրջանում, մահացությունը կարող է սկսվել մոտակա օրերին և շաբաթներին»,-ասել է Յազարեվիչը:
Նրա խոսքով՝ ԱՀԿ փորձագետները դեռևս չեն կարողանում կանխատեսել, թե երբ Իտալիայում կլինի համաճարակի գագաթնակետը, սակայն մահացածների մեծ մասը հիվանդացել էին դեռևս 2-3 շաբաթ առաջ:
«Մի քանի օրվա ընթացքում երեքից մինչև հարյուրավոր մահվան դեպքերի կտրուկ աճը սահմանափակեց Իտալիայի հնարավորությունները մահացածների հետ շփվածներին հետևելու և նրանց մեկուսացնելու հարցերում: Մեծ խնդիր էր այն, որ Իտալիայի հյուսիսում գրանցված մի շարք դեպքեր չունեին հստակ համաճարակաբանական կապ: Կորոնավիրուսից մահացածները վարակվել էին միջինը 2-3 շաբաթ առաջ»,-նշել է ԱՀԿ ներկայացուցիչը:
Կորոնավիրուսի համաճարակի մասին Չինաստանի իշխանություններն ԱՀԿ-ին հայտնել էին դեկտեմբերի 31-ին: Հայտնի է, որ վարակը տարածվել է Հուբեյ նահանգի Ուհան քաղաքից: Չինաստանի սահմաններից դուրս վարակների մեծ մասը հայտնաբերվել է Հարավային Կորեայում, Իրանում և Իտալիայում: Ընդհանուր առմամբ, վարակի դեպքեր են հաստատվել ավելի քան 110 երկրում:
Ամբողջ աշխարհում կորոնավիրուսով վարակվածների ընդհանուր թիվը անցել է 153 000-ից, մահվան դեպքերը` 5700-ից: