Այս պահի դրությամբ մենք ունենք կորոնավիրուսի 30 դեպք, որից 19-ը Էջմիածնի հետ փոխկապակցված անձինք են, մեկ հոգի բուժվել է: Այս մասին ֆեյսբուքյան ուղիղ եթերով հայտնեց վարչապետ Նիկոլ Փաշինյանը։
«Վարակվածներից երեքը «Գոլդեն Փելիսում» մեկուսացված անձինք են, այդ թվում առաջին կինը: Երեք հոգի էլ արտադրական ձեռնարկություններից մեկում հայտնաբերված դեպքերն են, որի հետ կապված մենք հիմա մեկուսացման աշխատանքներ ենք իրականացնում»,-ասաց վարչապետը և նշեց, որ ևս 4-ը առանձին դեպքեր են։
Նա հայտնեց նաև, որ Էջմիածնում 129 քաղաքացու մոտ ջերմություն է արձանագրվել. «Մենք նրանց խնդրել ենք վերադառնալ տտուն եւ ինքնամեկուսանալ: Ուզում եմ նրանց շնորհակալություն հայտնել դրա համար: Այն, որ իրենք ջերմություն ունեն, դեռ ոչ մի բան չի նշանակում»,-տեղեկացրեց Նիկոլ Փաշինյանը։
Նա նաև նշեց, որ Հայաստանում այս պահին կորոնավիրուսի կասկածանքով մեկուսացվել է ավելի քան 300 մարդ: Նրա խոսքով՝ 300 քաղաքացու մեկուսացնելու համար տարածքներ են պատրաստել. «Մենք քննարկեցինք և որոշեցինք, որ առայժմ մեկուսացման քաղաքականությունը պետք է շարունակել»,- ընդգծեց նա։