ՀՀ վարչապետ Նիկոլ Փաշինյանն այսօր կառավարության արտահերթ նիստում հայտնել է, որ փետրվարի 20-ից հետո Իրանից Հայաստանի Հանրապետություն է եկել 2092 ՀՀ քաղաքացիություն ունեցող անձ , իսկ Իտալիայից 761 ՀՀ քաղաքացիություն ունեցող անձ։
Անդրադառնալով Հայաստան եկող բոլոր քաղաքացիներին ինքնամեկուսացնելու առաջարկին՝ Փաշինյանն ասաց. «Եթե այս կանոնով շարժվեինք, այս պահի դրությամբ առնվազն 3500 մեկուսացված քաղաքացի պետք է ունենայինք, ընդ որում այս քաղաքացիներից գործնականում իրականության մեջ հիվանդ են եղել 5-6 հոգի։ Այսինքն 3000 մարդու մեկուսացնում ենք, որ 5-6 հոգու հայտնաբերենք։ Սա հասկանու՞մ եք ինչ լուրջ խնդիր է։ Մեր հույսն այն է, որ մարդիկ քիչ կգան, բայց եթե այսպես վարվենք, կգան, կասեն դե մեկուսացրեք, կարողա մի հատ էլ տեսնեն, որ Հայաստանում 5 աստղանի հյուրանոցում են մեկուսացնում, տասնյակ հազարներով գան»։
Դիտարկմանը, թե պարտադիր չէ պետությունը ֆինանսավորի քաղաքացու կացության վայրը, Փաշինյանը պատասխանեց. «Մենք կրկին այդ նույն տարբերակով մեկուսացրել ենք այս 1000-ավոր քաղաքացիներին, մենք իրենց ասում ենք մեկուսացված եք, իրենք էլ ասում են, եղավ ու երեկոյան դուրս են գալիս, գնում ռեստորան, սրճարան, բար։ Այսինքն ամեն տան մոտ պետք է ոստիկան դնենք, որպեսզի ապահովենք նրա ինքնամեկուսացումը»։