Ունենք հիմնավոր կասկածներ, որ նիստը միտումնավոր է հետաձգվել, որ հետագայում 4 վարչապետներից մեկը կամ երկուսը հանրապետությունում չլինեն. այս մասին լրագրողների հետ զրույցում հայտարարեց ՀՀ երկրորդ նախագահ Ռոբերտ Քոչարյանի պաշտպաններից Հայկ Ալումյանը:
Նշենք, որ այսօր ՀՀ երեք նախկին վարչապետներ Վազգեն Մանուկյանը, Խոսրով Հարությունյանը և Կարեն Կարապետյաանը, ինչպես նաև Արցախի նախկին վարչապետ Անուշավան Դանիելյանը դատարանում պետք է պնդեին իրենց երաշխավորությունը:
Ալումյանը նշեց, որ վարչապետներին տեղեկացրել էին, որ դատարանից իրենց զանգ է եկել, որ նիստը տեղի չի ունենալու, ուստի որոշել էին գալ դատարան, և եթե հանկարծ որոշվեր, որ դատական նիստը տեղի է ունենալու, ապա վարչապետներին լրացուցիչ ասելու էին այդ մասին, որ նրանք չգան այնտեղ սպասեն:
«Մենք պետք է համոզվեինք՝ նիստը լինելու է, թե չէ, նոր իրենց տղեկացնեինք, դրա համար է, որ նրանք այստեղ չեն հիմա»,- ասաց նա:
Ալումյանը տեղեկացրեց, որ երեք միջնորդություն է մուտքագրել դատարանի գրասենյակ՝ խափանման միջոցի հետ կապված, ինչպես նաև 4-ը նախկին վարչապետների երաշխավորական նամակները, և տեղեկություն չկար, որ այսօրվա դատական նիստը կարող է տեղի չունենալ, և հանկարծ այսօր առավոտյան տեղեկանում են՝ դատական նիստը տեղի չի ունենա: «Շատ լուրջ հարցեր են առաջանում, մենք հաջորդ դատական նիստին պահանջելու ենք, որ դատավորը մանրամասնի իր առողջական խնդիրների մասին, որոնք ունեցել է, եթե բուժում է ստացել, ապա որտեղ է ստացել, որ մենք կարողանանք համոզվել, որ այս ամեն ինչը չի արվել զուտ այն բանի համար, որ հետագայում երաշխավորներից մեկի կամ երկուսի ներկայությունը դարձնեն անհնարին»,- ասաց Ալումյանը:
Նա հավելեց, որ եթե դատարանն իրեն թույլ է տալիս ՀՀ երկրորդ նախագահի առողջական վիճակի հետ կապված ամեն ինչը դետալային հրապարակել, եթե դա համարում է՝ թույլատրելի միջոց է, ապա դատարանը, առավել ևս պետք է այդ նույն մոտեցումից ելնելով, ինքն իր առողջական վիճակի վերաբերյալ ամենասպառիչ տեղեկությունները ներկայացնի. «Մենք դա պահանջելու ենք: Մենք ունենք կասկածներ, որ սա արվեց միտումնավոր, որ հետագայում այդ 4 երաշավորներից մեկը-երկուսը հանրապետությունում չլինեն, քանի որ երաշխավորները, բացի երաշխավորագիր նամակը գրելուց և դեպոզիտ վճարումն անելուց, պետք է ներկա գտնվեն դատարանի դահլիճում միջնորդության քննարկման ժամանակ»,- ասաց նա:
Նշենք, որ Ռոբերտ Քոչարյանի գործով դատական նիստն այսօր չի կայացել դատավոր Աննա Դանիբեկյանի հիվանդ լինելու պատճառով:
https://www.youtube.com/watch?v=7bydtnM1Rko&feature=emb_logo