Վրաստանում պատրաստվում են նրան, որ կորոնավիրուսով վարակվածների թիվը լրջորեն կաճի։ Վարչապետ Գեորգի Գախարիան այսօր հայտարարել է, որ երկիրը անցում է կատարում այն փուլից, երբ վարակը կարելի էր կանգնեցնել, այն փուլին, երբ վիրուսն արագ կտարածվի։ Ընդ որում, վարչապետը դեռեւս չի տեսնում երկրում արտակարգ դրություն մտցնելու անհրաժեշտություն, հայտնում է «Նովոստի-Գրուզիան»։
Ելույթ ունենալով այսօր ճեպազրույցում՝ Գախարիան ասել է, թե լավ նորությունն այն է, որ կորոնավիրուսով վարակված առաջին քաղաքացին արդեն դուրս է գրվել հիվանդանոցից եւ դրա համար շնորհակալություն է հայտնել «բժշկական անձնակազմին»։ Ընդ որում, վարչապետը նշել է, որ դա հանգստանալու առիթ չէ։
Նրա խոսքերով՝ դա նշանակում է, որ պետք է փոխվի խնդրի կառավարման մոտեցումն ու մենեջմենթը։ Առաջին հերթին դա վերաբերում է վարակված մեծաթիվ պացիենտներ ընդունելու առողջապահության համակարգի պատրաստվածությանը։
Գախարիան հայտնել է, որ վաղվանից կարգելվի երթուղային տաքսիների երթեւեկությունը Թբիլիսիում եւ երկրի այլ քաղաքներում։ Նրա խոսքերով՝ համաճարակաբանները կարծում են, որ այսօրվա դրությամբ երթուղայինները վիրուսի տարածման ամենամեծ վտանգն են պարունակում։
Ընդ որում, Գախարիան չի բացառել, որ եթե իրավիճակը բարդանա այն աստիճան, որ անհրաժեշտ լինի ավտոբուսներն ու մետրոն էլ արգելել, այդ քայլն էլ կարվի։
Պատասխանելով լրագրողների այն ակնարկին, որ եկեղեցիներում շարունակում են արարողություններ կատարել, վարչապետն ասել է, թե կառավարությունն արդեն խորհրդատվություն է տվել այն մասին, որ չի կարելի զանգվածային միջոցառումներ անցկացնել փակ տարածքներում, սակայն այս փուլում կառավարությունը եկեղեցուն հատուկ հրահանգներ չի տա։
Վարչապետը մի քանի անգամ նշել է, որ կառավարությունը խորհուրդ է տալիս 70 տարեկանից բարձր քաղաքացիներին գտնվել ինքնամեկուսացման մեջ։
Նա հայտնել է, որ Առողջապահության նախարարությանը եւ «Վրաստանի փոստին» հանձնարարվել է մշակել մեխանիզմ, որով նրանք պետք է սոցիալապես անպաշտպան մարդկանց եւ թոշակառուներին առաջարկեն ծառայություններ, որոնց կարիքը նրանք ամեն օր ունեն։
Գախարիան ասել է, որ կառավարության հրահանգները պարտադիր են բոլորի համար։ Ընդ որում, նա հայտնել է, որ վաղը կհայտարարվեն կառավարության խորհրդատվությունների, մասնավորապես կարանտինի եւ ինքնամեկուսացման չկատարման տուգանքների եւ պատժամիջոցների մասին կոնկրետ որոշումներ։
news.am