Բրիտանական Daily Mail պարբերականը հրապարակել է ուշագրավ կադրեր, որոնք արվել են Իսպանիայի մայրաքաղաք Մադրիդի հիվանդանոցներում և ցույց են տալիս՝ ինչպես են կորոնավիրուսով ախտահարվածները նախքան բժշկի սենյակ հասնելը ստիպված պառկած մնացել միջանցքների հատակին:
Նշվում է, որ հիվանդանոցներում վարակակիրներն այնքան շատ են, որ բուժանձնակազմը չի հասցնում նրանց ընդունել:
Լուսանկարներում երևում է, որ մարդիկ, հատակին պառկած, հազում են, ոմանք էլ միացված են թթվածնային ապահովման սարքին: Բացի այդ, հիվանդները չափազանց մոտ են իրար նստած՝ չպահպանելով սոցիալական հեռավորության մասին կոչը:
Շոկային լուսանկարներն արվել են Infanta Leonor և Severo Ochoa de Leganes հիվանդանոցներում:
Պարբերականը մանրամասնում է, որ Իսպանիայում կա 33 089 վարակակիր, գրանցվել է մահվան ավելի քան 2000 դեպք: Մահերի 58 տոկոսն արձանագրվել է Մադրիդում: Նշվում է, որ կորոնավիրուսի տարածման հետ կապված ճգնաժամը կոլապսի շեմին է հասցրել երկրի առողջապահական համակարգը: Իսպանիան Եվրոպայում համավարակի նոր օջախ դառնալու վտանգի տակ է:
