«Արցախի Հանրապետությունում նոր կորոնավիրուսային վարակի տարածումը կանխելու և հիվանդների վաղ հայտնաբերման նպատակով կասկածելի անձանցից նմուշառումը իրականացվում է՝ հաշվի առնելով համաճարակաբանական վերհուշը (անամնեզ) և կլինիկական ախտանշանները»,-«Փաստինֆո»-ի հետ զրույցում այս մասին ասաց Արցախի Հանրապետության նախագահի խորհրդական Տիգրան Աբրահամյանը՝ անդրադառնալով աշխարհում տարածված նոր կորոնավիրուսի հետ կապված իրավիճակին:
Տիգրան Աբրահամյանի փոխանցմամբ, համաճարակաբանական վերհուշ վերցվում է այն անձից, ով վերջին 14 օրվա ընթացքում գտնվել է այն երկրներում, որտեղ գրանցվել են կորոնավիրուսով վարակման դեպքեր կամ սերտ շփում է ունեցել կորոնավիրուսով հիվանդի կամ վարակակրի հետ, ով ունի 38˚C աստիճանից բարձր ջերմություն, հազ, դժվարացած շնչառություն:
Անդրադառնալով հարցին հնարավոր մեկուսացված քաղաքացիների վերաբերյալ հարցին, Տիգրան Աբրահամյանն ասաց.«Արցախում մեկուսացված քաղաքացիների թիվը փոփոխական է, այն անձինք, ովքեր համապատասխան ախտանիշներ ունեն և նրանից նմուշառում է կատարվում (ունեն կասկածելի ախտանիշներ), նրանց մեկուսացնում ենք»:
Նշենք, որ Արցախում մարտի 31-ին սպասվում են խորհրդարանական եւ նախագահական ընտրությունները: Հարցին այս համատեքստում արդյո՞ք Արցախի իշխանությունները կորոնավիրուսով տարածման հնարավոր ռիսկեր չեն տեսնում, Տիգրան Աբրահամյանը պատասխանեց.«Ես նման իրավասություններ չունեմ մեկնաբանելու , միայն կարող եմ տեղեկացնել, որ ընտրական գործընթացով զբաղվող պետական մարմինները կազմակերպչական, անվտանգության, հանրային առողջությունը չվտանգելուն ուղղված մեծածավալ աշխատանք են իրականացնում»:
Արցախի նախագահի խորհրդականը մանրամասնեց. «Մասնավորապես, նպատակ ունենալով բացառապես ընտրողների առողջական վիճակը հնարավորինս անխոցելի պահելը, քվեարկության օրը տեղամասային կենտրոնների սանիտարահիգիենիկ վիճակն ու տեղամասային ընտրական հանձնաժողովականների, ընտրողների և այլ անձանց առողջական վիճակի անվտանգության ապահովման ուղղությամբ իրականացվել են մի շարք միջոցառումներ: Օրինակ՝ տեղամասային կենտրոններում գտնվողները (ընտրական հանձնաժողովի անդամներ, ընտրողներ և այլ անձինք) ապահովված կլինեն մեկանգամյա օգտագործման դիմակներով, ձեռնոցներով, ախտահանիչ նյութերով (ալկոգել, քլորակիր), տեղամասային կենտրոններում կլինեն ուղեցույց-բժշկական ցուցումներ: Տեղամասերը կախտահանվեն նախապես: Քվեարկելիս գրառում կատարելու համար յուրաքանչյուր ընտրողի կտրամադրվի անհատական գրիչ: Քվեարկության օրը Արցախի Հանրապետության բոլոր պետական բուժհիմնարկները կիրականացնեն շուրջօրյա հերթապահություն»: