ՀՀ ԱԺ «Բարգավաճ Հայաստան»խմբակցության ղեկավար Գագիկ Ծառուկյանը դժգոհ է կորոնավիրուսի տարածումը կանխելու և դրա հետևանքները վերացնելու ուղղությամբ կառավարության ձեռնարկած միջոցառումներից:
Գագիկ Ծառուկյանի խոսքով` կորոնավիրուսը Հայաստանում չի եղել, եկել է դրսից և պետք էր այնպես անել, որ վիրուսը ներս չմտներ:
«Ես դժգոհ եմ ցուցաբերված մոտեցումից: Այսօր բոլոր սահմաններում, օդանավակայանում պետք է թեստեր լինեին, որ մարդկանց համապատասխան թեստերով ստուգեին, ով ուներ խնդիր, մուտքն արգելեին կամ մեկուսացնեին կամ ուղարկեին բուժվելու: Մինչև այսօր այդ քայլին ուշադրություն չի դարձվել՝ ո՛չ հիվանդանոցներում, որ օդանավակայանում ո՛չ սահմաններում»,- հայտարարել է Ծառուկյանը:
Գագիկ Ծառուկյանը լսել է խմբակցության անդամների առաջարկությունները և կազմել են արձանագրություն, որը պետք է ներկայացվի կառավարությանը և Ազգային ժողովին:
Ըստ Ծառուկյանի` այսօր Հայաստանում կա 200 հազար ընտանիք, որոնց անդամներն օրավարձով են մարդիկ աշխատում՝ ստանալով 5000- 7000 դրամ: Նրա խոսքով` այդ մարդիկ չեն աշխատում, 200 հազար ընտանիք չի աշխատում և առաջարկում են օրավարձով աշխատողին, թոշակառուին, նպաստառուին ամսական 70 հազար դրամ գումար տրամադրել: