ՀՀ առողջապահության նախարար Արսեն Թորոսյանը ԳԱԼԱ-ի հարցին ի պատասխան, թե նոր տեսակի կորոնավիրուսի քանի հաստատված դեպք կա Գյումրիում, ճիշտ չի՞ լինի ավելի կոնկրետ մատնանշել, թե ՀՀ որ բնակավայրում որքան դեպք է արձանագրվել, նշել է․ «Այսօր կամ ամենաուշը վաղը կլինի քարտեզ, որտեղ նշված կլինեն այն բնակավայրերը, որտեղ նշված կլինեն հաստատված դեպքերը։ Գյումրիում դրանք շատ չեն։ Մեկ կամ երկու՝ ձեռքի մատների վրա կարելի է հաշվել։ Անգիր, ճիշտն ասած, չեմ հիշում։ Սակայն նրանք մեկուսացված են։ Նրանց շփման շրջանակը պարզ է և մեկուսացված։ Գումարած դրան՝ Գյումրիի ինֆեկցիոն հիվանդանոցում շարունակվում է բուժումը նաև այլ բնակավայրերից այնտեղ գտնվող մեր քաղաքացիների։ Այսինքն, Գյումրիի ինֆեկցիոնը մեր հիվանդանոցներից մեկն է, որտեղ բուժում են ստանում պրակտիկորեն անսիմպտոմ կամ թեթև դեպքերով մեր քաղաքացիները»։
Նախարարը նաև ասել է, որ Հայաստանը չունի թեստերի պակաս և շարունակում է ձեռք բերել։ Մինչ օրս արվել է 1440 թեստ, որից դրական է եղել 290-ը։