Նոր տեսակի կորոնավիրուսի պաթոգենը, նախքան ամիսներ անց Չինաստանում բռնկվելը, որը գլոբալ առողջապահական ճգնաժամ է առաջացրել, հնարավոր է, մարդկանց օրգանիզմում գոյություն է ունեցել տարիներ, նույնիսկ տասնամյակներ շարունակ։ Այսպիսի եզրակացության են եկել աշխարհի առաջատար մասնագետներն իրենց նոր հետազոտության մեջ, որը մարտի 17-ին հրապարակվել է Nature Medicine գիտական ամսագրում, գրում է South China Morning Post-ը։
ԱՄՆ-ի, Մեծ Բրիտանիայի և Ավստրալիայի հետազոտողներն ուսումնասիրել են ամբողջ աշխարհի գիտնականների հրապարակած կորոնավիրուսի էվոլյուցիայի վերաբերյալ տվյալները և հայտնաբերել, որ հնարավոր է՝ այդ վիրուսի՝ կենդանուց մարդուն անցումը կատարվել է նախքան Չինաստանի Ուհան քաղաքում առաջին դեպքի հայտնաբերումը, գրում է աղբյուրը։
ԱՄՆ Առողջապահության ազգային ինստիտուտի տնօրեն Ֆրենսիս Քոլինզն ասել է, որ ուսումնասիրությունը միտված է պարզելու կորոնավիրուսի՝ կենդանիներից մարդուն անցնելու հնարավոր սցենարը։
«Տարիներ կամ տասնամյակներ շարունակ աստիճանական էվոլյուցիոն փոփոխությունների արդյունքում վիրուսն, ի վերջո, ձեռք է բերել մարդուց մարդուն փոխանցվելու և կյանքի համար հաճախ վտանգավոր լուրջ հիվանդություններ առաջացնելու ունակություն»,-ասել է նա ինստիտուտի կայքում հրապարակված հոդվածում:
«Միանգամայն հնարավոր է, որ SARS-CoV-2-ի հարուցիչը փոխանցվել է մարդուն՝ ձեռք բերելով գենոմային առանձնահատկություններ»,- ասված է հոդվածում:
Գիտնականներից մեկի պնդմամբ՝ ի հայտ են գալիս ավելի ու ավելի շատ գիտական ապացույցներ առ այն, որ վիրուսի ծագումը տեղի չի ունեցել Չինաստանում:
«Covid-19-ի հայտնվելն Ուհանում չի նշանակում, որ այն առաջացել է Ուհանում»,- հայտնել է նա։
Պեկինի հիվանդանոցներից մեկում աշխատող բժիշկն, իր հերթին, հայտնել է, որ անցյալ տարի մի քանի երկրների բուժաշխատողներ հաղորդել են տարօրինակ թոքաբորբի բազմաթիվ դեպքերի մասին:
Այս հիվանդներից ստացված նմուշների կրկնակի ուսումնասիրությունը կարող է ավելի շատ տեղեկություններ տալ այս ահագնացող համավարակի պատմության մասին, ասել է բժիշկը։
«Կգա մի օր, երբ ամեն ինչ ջրի երես դուրս կգա»,- հայտնել է նա։