Առողջապահության համաշխարհային կազմակերպությունը հայտնել է, որ կորոնավիրուսը փոխանցվում է ոչ թե օդի միջոցով, այլ ջրի միկրոսկոպիկ մասնիկների միջոցով, որոնք հազալու կամ փռշտալու ժամանակ արտաշնչում է վարակված մարդը, հաղորդում է Российская газета պարբերականը:
Նման եզրակացության գալու համար մասնագետները վերլուծել են Չինաստանի 75 հազար վարակակիրների: Կորոնավիրուսը մարդուց մարդուն է փոխանցվում սերտ շփման միջոցով, 1 մետրից պակաս տարածության վրա: Վիրուսը կարող է օրգանիզմ ներթափանցել բերանի, քթի կամ աչքերի միջոցով, եթե ձեր կողքին հազա հիվանդը: Կորոնավիրուսը փոխանցվում է ինչպես վարակակրի հետ անմիջական շփման, այնպես էլ առարկաների միջոցով:
Այս տվյալները կարևոր են COVID-19-ի բուժման արդյունավետ մեթոդների որոնման և դրա տարածումը կանխելու համար:
Հետազոտության մեջ նաև նշվում է, որ առանձին դեպքերում կորոնավիրուսը կարող է փոխանցվել նաև օդի միջոցով, սակայն դա հնարավոր է միայն հիվանդանոցներում, երբ հիվանդը միացված է թոքերի արհեստական շնչառության սարքերին (սարքից անջատման պահին), կատարվում է շնչափողահատում, ինտուբացիա և այլ նման գործողություններ կամ սրտաթոքային վերակենդանացում:
Այստեղից եզրակացություն է կատարվում, որ դիմակները, ռեսպիրատորները և պաշտպանիչ այլ միջոցներն առաջին հերթին անհրաժեշտ են հիվանդների հետ շփվող բժիշկներին: ԱՀԿ-ն ընդգծում է, որ բժիշկներն ու բուժքույրերը ոչ միայն պետք է կարողանան դրանք ճիշտ օգտագործել, այլև չմոռանան հիգիենայի այլ մեթոդների մասին: