«Սոցիալական արդարություն» ՀԿ նախագահ, քրեական արդարադատության, ԵԽ բանտային ու պրոբացիոն համակարգերի փորձագետ Արշակ Գասպարյանը Հայաստանում կորոնավիրուսի տարածման առաջին օրերից հրապարակային խորհուրդներ ու հորդորներ էր հասցեագրում արդարադատության նախարարությանն ու քրեակատարողական ծառայությանը՝ ՔԿՀ-ները հիվանդությունից զերծ պահելու համար։
Նա մարտի 20-ին ֆեյսբուքյան գրառմամբ հստակ քայլեր էր նշել, որոնք պետք է իրականացնի պետությունը։ Նա հիշեցրել էր՝ բանտերը, միշտ, բոլոր ժամանակներում, համաճարակների ու վարակների ամենառիսկային վայրերից մեկն են։
«Այստեղից է, հաճախ, սկսվում կամ հասարակությունում շարունակվում վարակումների շղթան։ Նաև այս պատճառով ու հիմնավորմամաբ, պետությունները հրաժարվում են նոր բանտեր կառուցել ու մարդկանց «լցնել» էնտեղ։ Բայց սրա մասին մոտ օրերս»,-նշել էր նա ու ավելացրել, որ շատ արագ պետք է իրականացնել հետևյալ միջոցառումները.
1. Կորոնավիրուսի ֆոնդում հավաքված միլիոնավոր դրամների նվիրատվություններից մի մաս հատկացնել բանտերին
2. գնել թեստեր և հնարավորինս բոլոր ազատազրկվածներին ու աշխատակիցներին թեստավորել
3. ծայրահեղ դեպքում, թեստավորել բոլոր նրանց ովքեր․
ա/ մարտի 1-ից առ այսօր ունեցել են երկարատև տեսակցություններ
բ/ այդ տեսակցությունների տրամադրման օրերի հերթափոխային ծառայողներին
գ/ պատրաստվում են պատժի լրիվ կրումով (օրացույցային) ազատվել առաջիկա 14 օրվա մեջ
դ/ պատիժ են կրում բաց տիպի ուղղիչ հիմնարկում, և մարտի 1-ից մինչև արտակարգ դրություն
հաստատելը, գտնվել են հիմնարկի սահմաններից դուրս
ե/ վերը նշված ժամանակահատվածում ունեցել են կարճաժամկետ մեկնումներ՝ հատկապես
Արմավիրի մարզ
4. առանձնացնել կարանտինային հիմնարկներ կամ կարանտինային խցեր՝ պահպանելով Քր․Կատ․ Օր-ի 68 հոդվածի պահանջները
5. առանձնացնել ԱՀԿ կողմից առավել ռիսկային համարվող ազատազրկվածներին մյուսներից՝պահպանելով Քր․Կատ․ Օր-ի 68 հոդվածի պահանջները
6. Առնվազն 2-3 օրը մեկ անգամ տեղեկացնել ՔԿՀ-ներում և Պրոբացիայի ծառայությունում տիրող իրավիճակի վերաբերյալ՝ առնվազն վերը թվարկված կետերի ու ենթակետերի դիտարկմամբ։
Այս գրառումից օրեր հետո էլ Panorama.am-ի գրավոր հարցմանն ի պատասխան հանդարտեցնում էին՝ ամեն ինչ վերահսկելի է։ Իսկ այսօր արդեն հայտնի դարձավ, որ «Վարդաշեն» ՔԿՀ-ի աշխատակիցներից մի քանիսի մոտ հաստատվել է կիորոնավիրուսը։
«Վայն եկել տարել է, եթե ազատազրկվածներից մեկի մոտ «հանկարծ» բացահայտվեց COVID-19»,-ասում է Արշակ Գասպարյանը։
ՔԿՀ-ում վարակի դեպքերի հաստատումից հետ անհրաժեշտ քայլերը Արշակ Գասպարյանը թվարկեց Panorama.am-ի հետ զրույցում։
«Արդարադատության նախարարությունից ասում են, որ ամեն ինչ անում են, բայց ինչ են անում՝ անհասկանալի է։ Պիտի ունենանք կարանտինայի խցեր, բոլոր խցային տիպի շինություններից դատապարտյալներին պետք է տեղափոխել կացարանային տիպի հիմնարկներ, որքան հնարավոր է շատերին։ «Աջակցություն դատապարտյալին» հիմնադրամի գումարներով պետք է աշխատացնել Աբովյան ՔԿ հիմնարկի կանանց տեղամասի արտադրամասը, որը կկարողանա առնվազն դիմակներով ծածկել ոչ միայն բանտային ու Պրոբացիոն համակարգերը, այլև այլ քաղաքացիների։ Այն լիարժեք գործող ձեռնարկություն ու ռեսուրս կլինի Հայաստանի համար»,- ասաց փորձագետը
Նա պնդում է՝ բոլոր աշխատակիցներն ու ազատազրկվածները պիտի ապահովված լինեն անհրաժեշտ հիգիենիկ բոլոր հարմարություններով։
«Կրոնովիսրուսի անվամբ բացված հիմնադրամում հավաքված գումարներից մի մաս ծախսվի հենց այս ու այլ փակ համակարգերը օդմաղիչ ու թեստային համակարգերով ապահովելուն
բոլոր այն աշխատակիցներն, ովքեր վարակյված ու ռիսկային քաղաքներից են, պիտի անհրաժեշտ ու ավելի զննություն անցնեն՝ մինչև հիմնարկ մուտք գործելը։ Հիմա, բոլորն, ովքեր շփվել են այս անձանց հետ, պիտի մեկուսացվեն»,-նշեց նա։