Ֆիլիպինների ամենագեղատեսիլ անկյուններից մեկի՝ Փալավանի լողափերը, որոնք նախքան կորոնավիրուսի համավարակը պահանջված զբոսաշրջային ուղղություն էին, համընդհանուր կարանտինի հետևանքով ամայացել են՝ բնությանը հնարավորություն տալով ակտիվանալ այդ հատվածներում:
Ինչպես նշում է Daily Mail-ը, հազարավոր վարդագույն մեդուզաներ, որոնք մարդկանց ակտիվության հետևանքով տարիներ շարունակ չէին երևում այս տեղանքում, այժմ գրոհել են առափնյա ջրերը:
Կենսաբանների փոխանցմամբ՝ այժմ այս կենդանիները, մարդկանց կողմից սպառնալիք չզգալով, հատակից ջրի երես են բարձրանում: Ավստրալացի ծովային կենսաբան Շելդոն Ռեյ Բոկոն հրապարակել է ուշագրավ տեսանյութ՝ նշելով, որ այն արվել է մարտի 23-ին՝ Կորոնգ Կորոնգ լողափում:
«Ինչպես երևում է COVID19-ի սահմանափակումները չեն տարածվում մեդուզաների վրա»,-գրել է գիտնականը:
Ֆիլիպիններում նոր տեսակի կորոնավիրուսի տարածման հետևանքով բնակչությանը տանը մնալու կարգադրություն է տրվել: Երկրում գրանցվել է մոտ հարյուր մահ, կա 2300 վարակակիր:
