Ապրիլի 2-ին «Սուրբ Գրիգոր Լուսավորիչ» բժշկական կենտրոնից չորս պացիենտ տեղափոխվեց Նաիրի բժշկական կենտրոն։ Դա պայմանավորված էր այն հանգամանքով, որ «Սբ. Գրիգոր Լուսավորիչը» վերապրոֆիլավորվեց և այս օրերին կորոնավիրուսով վարակված քաղաքացիներին պետք է սպասարկի։ Չորս պացիենտներից մեկի մոտ կարճ ժամանակ անց մահ արձանագրվեց։
Factor.am-ի տեղեկություններով՝ մահն արձանագրվել է հիվանդի տեղափոխումից 40 րոպե անց։ Լուրի իսկությունը ճշտելու համար կապ է հաստատվել «Սուրբ Գրիգոր Լուսավորիչ» բժշկական կենտրոնի խոսնակ Ծովինար Խաչատրյանի հետ։
«Եղել են ծայրահեղ ծանր և միջին վիճակում գտնվող հիվանդներ։ Այստեղից նորմալ տեղափոխումն իրականացվել է։ Իսկ թե երբ է մահացել պացիենտներից մեկը՝ նման ինֆորմացիայի չենք տիրապետում», – ասաց խոսնակը։
Կապ հաստատվեց Շտապօգնության ծառայության հետ՝ ճշտելու, թե հնարավո՞ր է՝ պացիենտի մահը վրա է հասել տեղափոխման ճանապարհին։ Այստեղից ասացին, որ տեղափոխումը բարեհաջող իրականացվել է, որևէ խնդիր չի եղել։
Factor.am-ը զրուցել է «Նաիրի» բժշկական կենտրոնի անեսթեզիոլոգիայի և ինտենսիվ թերապիայի ծառայությունների ղեկավար, ՀՀ գլխավոր անեսթեզիոլոգ Անատոլի Գնունու հետ։ Վերջինս ասաց, որ մահացած հիվանդը ծանր վիճակում է եղել՝ կենտրոն տեղափոխվելու ժամանակ։
«Մեր կենտրոն ընդունվելուց մոտ 2 ժամ անց է հիվանդը մահացել։ Նա բարձր տարիքի տղամարդ էր և մոտ 20 օր «Գրիգոր Լուսավորիչ»-ում կոմայի մեջ է գտնվել։ Դա անդարձելի կոմա էր և այդ մահը սպասելի էր։ Մեզ «Գրիգոր Լուսավորիչ»-ից զգուշացրել էին այդ հիվանդի մասին», – նշեց Գնունին։
Նա շեշտեց, որ հիվանդի մոտ սրտի ռիթմի խանգարում է եղել, շաքարային դիաբետ։ Անեսթեզիոլոգի խոսքով՝ հիվանդն այդպես էլ կոմայից դուրս չի եկել։
Կրկին կապ է հաստատվել «Սբ. Գրիգոր Լուսավորիչ» ԲԿ՝ փորձելով հասկանալ, թե կոմայի մեջ գտնվող հիվանդին արդյո՞ք թույլատրվում էր տեղափոխել։ ԲԿ խոսնակ Ծովինար Խաչատրյանը, սակայն, պնդեց, որ կոմատոզ վիճակում գտնվող պացիենտ իրենց մոտից չի տեղափոխվել։ Նաեւ հարկ համարեց հավելել, որ ընդհանուր առմամբ, հիվանդի տեղափոխման պատասխանատվությունը կրում է տեղափոխող բժիշկը։
«Եվ եթե ռեանիմոբիլը տարել է, մնացյալ պատասխանատվությունն իրենց վրա է», – նշեց նա։
«Նաիրի» ԲԿ-ից կրկին հավաստիացրեցին, որ հիվանդը կենտրոն է տեղափողվել կոմայի մեջ և ուղղորդեցին «Սբ Գրիգոր Լուսավորիչ» ԲԿ ։ Այստեղից բուժկենտրոնի տնօրենի խորհրդական Սարգիս Ղազարյանը՝ նախ ասաց, թե չի հիշում՝ խոսքը որ հիվանդի մասին է։ Մեր դիտարկումից հետո, թե հիվանդին ընդամենը երեկ են տեղափոխել, Ղազարյանը հիշեց. «Այո, հիվանդներից մեկը կոմատոզ վիճակում է եղել։ Թե քանի օր է այդպես եղել՝ հիմա տվյալները ձեռքիս տակ չեն»։ Իսկ հարցին, թե որքանո՞վ էր նպատակահարմար ծանր վիճակում գտնվող պացիենտին տեղափոխել՝ Ղազարյանը հրաժարվեց պատասխանել։