Երեկվա Վարչապետի հարց ու պատասխանից ավիացիային վերաբերվող փոքր մասը լսելուց հետո իմ մոտ մասնագիտական համերաշխության ցանկություն առաջացավ։ Այս մասին ֆեյսբուքյան իր էջում գրել է ավիացիոն խորհրդատու Նավիկ Խաչատրյանը։
Նա, մասնավորապես, նշել է. «Ճիշտ է ես պետական ապարատում երբեք չեմ աշխատել, բայց մասնավորում էլ գրեթե նույնն է`ավիացիոն մասնագետը այնքան բարձր է վարձատրվում համեմատ երկրի միջինի, որ ինքը կարիք չունի օրինազանցություն գործի, կամ դրամաշորթություն կամ խաբեբայություն անի, կամ կոռուպցիայի մեջ թաթախվի։
Իր միակ խնդիրը կարիերայի ընթացքում հետեւելն է իր պարտականությունների պատշաճ ու անթերի կատարմանը, որ գործատուի մտքով անգամ չանցնի իրեն գործից հանել։ Ես ինքս շահույթով աշխատող Արմավիայում 2006-2008 թվերին օրական 14-15 ժամ աշխատում էի`որպեսզի պարտականություններս հասցնեմ եւ արածիս որակը չտուժի, որպեսզի գործատուն ինձանից միշտ գոհ մնա։ Մասնագետը չի կարող լինել կոռուպցիոներ, դա շատ քիչ հավանական է, այդպիսին կարող է լինել ղեկավարը, գործատուն`բայց ոչ մասնագետ աշխատողը։
Ինչեւէ, վերջին օրերին որոշ կայքերում խոսվում էր, որ 2015 թվականին այն ժամանակվա ՔԱԳՎ-ն անցել էր ICAO-ի համապատասխանության աուդիտը բարձր արդյունքներով։ Թեմային երեկ վարչապետն էլ անդրադարձավ։ Այդ աուդիտով ICAO-ն ստուգում է ՔԱԿ-ի գործառույթների համապատասխանությունը երկրում գործող օրենքներին եւ նորմատիվ ակտերին, ICAO-ի Standard And Recommended Practices (SARP)ստանդարտներին:
Աուդիտը արվում է ամեն 8 տարին մեկ անգամ, մեր մոտ հաջորդը կլինի 2023 թվականին։ Ըստ 2015 թվականին ICAO-ի կողմից իրականացված USOAP (Universal Safety Oversight Audit Programme) աուդիտի պետք է ստուգվեր Հայաստանի ՔԱԳՎ-ի այդ պահին առկա գործառույթների եւ կատարած աշխատանքի արդյունավետ համապատասխանեցումը ICAO-ի ստանդարտներին։
Ես ինքս հաշվարկեցի այն ինչ դրված է ICAO-ի սայթում, եւ այսպես Հայաստանի պահով`Legislation – 95,45%, Organization – 100%, Licensing – 96,81%, Operations – 94,03%, Airworthiness – 84.87%, Accident Investigation – 67,68%, Air Navigation Services – 86,98%, Aerodromes – 73,1%։ Այսպիսով աուդիտի ենթակա 8 սեգմենտների ընդհանուր համապատասխանութան արդյունքը կլինի`87,37%։ Սա տարածաշրջանում եւ աշխարհում բավական բարձր արդյունք է !
Համեմատության համար հաշվեցի մի քանի երկրների ընդհանուր արդյունքները`Վրաստան`88%, Թուրքիա`83,15%, Ադրբեջան`71%, նաեւ օրինակ Ռուսաստան`70,32%…Սա աուդիտ է ոչ թե հարցաշար`ճիշտ է դու լրացնում ես նախօրոք ուղարկված հարցաշարերը (ընդհանուր թվով մոտ 6-7 հազար հարց), բայց հետո գալիս են ICAO-ի աուդիտորները եւ ստուգում են քո ուղարկածի համապատասխանությունը իրականությանը։
Սա էլ ICAO-ի աուդիտի պաշտոնական կայքն է` icao.int/safety/Pages/USOAP-Results.aspx Դուք ինքներդ հեշտությամբ կարող եք մուտք գործել այս հղումով եւ ստուգել ցանկացած երկրի արդյունքները`մկնիկը պահում ես ստուգվող սեգմենտի գրաֆիկական սյունակի վրա`անմիջապես բերում է աուդիտ արված համապատասխանելիության տոկոսը, կարող ես նաեւ բոլոր 8 սեգմենտների միջինը հաշվել։
Հավատացեք սա շատ բարդ աուդիտ է, բազմակի անգամ ավելի դժվար քան փետրվարին ՔԱԿ-ում EASA-ի անցկացրած անվտանգության աուդիտը։ Ակնհայտ է, որ վարչապետին հերթական անգամ սխալ են զեկուցել ոլորտի պատասխանատուները։ Ավիացիան կարող են եւ պետք է զարգացնեն միայն ավիացիոն մասնագետները։ Պետությունը պետք է աջակցի եւ արդյունավետորեն վերահսկի։ Ավիացիան ավիատորներին»: