Ասողիկ աբեղա Կարապետյանը ֆեյսբուքյան էջում գրել է. «Ի պատասխան Ձեր նամակների (և զանգերի)՝ հետևյալն եմ ձեզ հաղորդում:
Այո, ամենքիս համար սրտի ցավ է, որ այս մահախորտակ ու հաղթական օրերին չպետք է մասնակցենք մեր սուրբ եկեղեցիներում կատարվող արարողություններին. այսպես է վճռվել Հայոց Հայրապետի կողմից՝ ի սեր և ի բարեխնամություն հավատավոր զավակներիս: Գիտակցենք և մնանք խոնարհությամբ, հավատարմորեն հետևենք Հայրապետական պատգամին:
Օրեր առաջ Մայր Աթոռն ուղղորդեց, թե ինչպես գոհացնենք զատկական տոների մեր հոգևոր կարիքները:
Վերստին անդրադառնում եմ ի պատասխան ձեր հարցումների՝
ա. ՃՐԱԳԱԼՈՒՅՑԻ ՍԲ ՊԱՏԱՐԱԳԻՆ մասնակցում ենք մեր տնից՝ առցանց դիտելով, հընթացս որի միմյանց կփոխանցենք Սբ Հարության ավետիսը, այնուհետև կվայելենք զատկական ընթրիքը՝ լուծելով պահքը և ծոմը.
բ. Եկեղեցիներից տուն տարվող ԼՈՒՅՍԸ՝ օրհնված մոմերը, խորհրդանիշ են նաև մեր հոգու լույսի, մեր ՀԱՎԱՏՔԻ, մեր ՔՐԻՍՏՈՆԵԱՎԱՅԵԼ ԿՅԱՆՔԻ. «Դո՛ւք եք աշխարհի լույսը: … Թող այնպես փայլի ձեր լույսը մարդկանց առաջ, որպեսզի տեսնեն ձեր բարի գործերն ու փառավորեն ձեր Հորը, որ երկնքում է» (Մատթ. Ե. 14, 16): Ստեղծված իրավիճակում թող ամեն ոք իր տանը եղած մոմը վառի՝ Տերունական աղոթքով, և այդպես հաղորդ դառնա Հարուցյալ Փրկչի լույսին (Սբ Հարության տոնին հաջորդող օրերին, քանի որ 40 օր շարունակ Տիրոջ Հարությունն ենք տոնախմբելու, անհատապես կգնանք եկեղեցի և մեր տուն կբերենք օրհնված ճրագը).
գ. Սբ Հաղորդություն կստանանք Սբ Հարության տոնից հետո՝ հաջորդող օրերին, նորեն անհատապես, ծոմ վիճակում այցելելով մոտակա՝ մեր ծխական եկեղեցին և դիմելով քահանային:
Տակավին օրհնություն չունենք մասնակցելու եկեղեցիներում կատարվող հանապազօրյա աղոթասացություններին ու խորհրդակատարություններին:
Մեր Ամենատես ու Ողորմած Տերը կհատուցի մեզ ի դիմաց մեր խոնարհության և համբերության, ի տրիտուր մերձավորների հանդեպ դրսևորած մեր սիրո, հոգատար և պատասխանատու վերաբերմունքի:
Թող Տիրոջ ողորմությունը մեզ հովանի լինի և Ամենազոր Աջը պահպանի չարից»: