Մարտունու բժշկական կենտրոնի տնօրենը հաստատել է, որ Գեղարքունիքի մարզում կորոնավիրուսով վարակված քաղաքացին 8 օր շարունակ թոքաբորբով գտնվել է Մարտունու հիվանդանոցում: Սակայն բժիշկներն առայժմ գտնվում են անորոշության մեջ ու պարզ չէ, թե երբ կմեկուսացվեն։ Նշենք, որ ԲԿ-ում գտնվելու ընթացքում նա ի սկզբանե չի թեստավորվել ու վարակի առկայությունն ախտորոշված չի եղել։
«Փաստինֆո»-ի հետ զրույցում Մարտունու բժշկական կենտրոնի տնօրեն Անդրանիկ Հարությունյանը հայտնեց, որ վարակակրի հետ շփված մյուս հիվանդները, բուժաշխատողները դեռ մեկուսացված չեն. նման որոշում, թույլտվություն չկա:
«Բոլորը կշարունակեն աշխատել մինչև հստակ պարզաբանումներ չլինեն»,-ասաց բկ-ի տնօրենն ու վստահեցրեց, որ բուժհաստատությունը շարունակում է աշխատել:
Հիշեցնենք, որ այսօր հայտարարվեց, որ Գեղարքունիքի մարզում եւս գրանցվել է կորոնավիրուսով վարակվելու դեպք։ Նախկինում այս մարզը միակն էր, որտեղ չէր արձանագրվել կորոնավիրուս։ Ներկայումս մտավախության կա, որ այն կարող է դառնալ նոր օջախ՝ վարակի տարածման համար։ Infoport-ի տվյալներով խոսքը գնում է մոտ 100 բուժաշխատողի մեկուսացման մասին։
«Փաստինֆո»-ի թղթակիցը զրուցեց նաեւ Մարտունի համայնքի ղեկավար Արմեն Ավետիսյանի հետ, որը հավաստիացրեց, որ փորձում են անել հնարավորինս ամեն ինչ՝ շփման շրջանակը պարզելու համար։
«Իհարկե վտանգ տեսնում եմ, դրա համար էլ միջոցներ ենք ձեռնարկում, որպեսզի բոլոր հնարավոր շփումները պարզենք, բացահայտենք, թե բժիշկները, հիվանդներն ում հետ են շփվել, դրանց մի մեծ մասը հայտնաբերել ենք ու զգուշացրել ենք, որ տներից դուրս չգան»,-ասաց Ավետիսյանը: