Ըստ պարետի ցուցման՝ արտերկրից Հայաստան տեղափոխված ԲԵՌ 200-ները չենք թույլատրում բացել, որպեսզի կանխարգելենք հնարավոր վարակից վարակումը: Այս մասին այսօր ԱԺ-ում ասաց ՀՀ Առողջապահության նախարար Արսեն Թորոսյանը՝ անդրադառնալով ԱԺ «Իմ քայլը» խմբակցության պատգամավոր Սասուն Միքայելյանի դիտարկմանը, որ արտասահմանում մահացած անձանց տեղափոխման հետ կապված բարեկամները խնդիրներ են տեսնում, ասում են՝ չեն կարողանում իմանալ տեղափոխված անձն իրենց հարազատն է, թե՞ ոչ:
«Այդ ամբողջ լոգիստիկ շղթան լավ չեմ պատկերացնում, բայց կարող եմ ենթադրել, որ տեղափոխողներն ու ստացողները հանգուցյալի հարազատները պետք է լինեն ու տեղափոխման պահից ինչ-որ նույնականացնող փաստաթղթեր պետք է լինեն ուղարկման ու ստացման հետ կապված: Ենթադրում եմ, որ առնվազն այս ժամանակահատվածում այս կարգավորումը պետք է մնա»,-ասաց նախարարը:
Միքայելյանը վստահեցրեց, որ մի քանի ամիս առաջ դեպք է եղել, որ այլազգի ներկայացուցիչ են ուղարկել Հայաստան. «Համարը խփում են, ուղարկում են, խառնում են իրար: Ասում են 200.000 դրամ տուգանք է սահմանված, մարդիկ էլ ասում են տուգանքը մուծեն, բացեն դիակ, բայց եթե իրենց հարազատը չլինի՝ ինչպե՞ս պետք է պատասխան տրվի»:
Արսեն Թորոսյանն ասաց, որ մասնագետների հետ կխոսի ու կփորձեն տարբերակներ մտածել, որպեսզի հարազատները համոզվեն, որ դա իրենց հանգուցյալն է և ոչ թե այլ անձի դիակ: