Փաստաբան Հովիկ Արսենյանը ֆեյսբուքյան իր էջում գրում է.
«Ստիպված եմ անդրադարձ կատարելու ԱԱԾ-ի հրապարակմանը՝ կապված Կճոյանին առաջադրված մեղադրանքի հետ։ Մի կողմից ստորագրությամբ պարտավորեցնում են չհրապարակելու.
Մյուս կողմից խեղաթյուրված մեղադրանքին հասարակական հնչեղություն են տալիս։
Որպես պաշտպան՝ հայտարարում եմ, որ մեղադրանքը անհիմն է, շինծու, իրավական հարթությունից դուրս և քրեական հետապնդում իրականացնելու հիմքերն ու նպատակը անհասկանալի….»:
Նշենք, որ Նավասարդ Արքեպիսկոպոս Կճոյանին մեղադրանք է առաջադրվել օֆշորի աղմկահարույց գործով։ Շուրջ 10 տարի է՝ ունեզրկված գործարար Փայլակ Հայրապետյանը պնդում է, որ իրեն պատկանող մոտ 100 միլիոն ԱՄՆ դոլարի անշարժ գույքը 2009թ. գրավ է դրել բանկում, որն այն գնահատել է 33 միլիոն դոլար եւ դրա դիմաց գործարար Աշոտ Սուքիասյանին հատկացրել 10.7 միլիոն դոլար: Վերջինը, պայմանավորվածության համաձայն, այդ գումարը Աֆրիկայում ոսկու եւ ալմաստի արդյունահանման մեջ ներդնելու փոխարեն, փոխանցել է կիպրոսյան օֆշորային մի քանի ընկերությունների, այդ թվում՝ Wlispera Holdings Limited-ին, իսկ Փայլակ Հայրապետյանը զրկվել է ունեցվածքից:
Կիպրոսի ռեգիստրի պաշտոնական կայքում Wlispera Holdings Limited-ի բաժնետեր նշվում էին Աշոտ Սուքիասյանը, նախկին վարչապետ Տիգրան Սարգսյանը եւ Նավասարդ Կճոյանը: Սակայն 2014 թվականի հունվար ամսին Վրաստանից հայաստանյան իրավապահներին արտահանձնված Սուքիասյանը հայտարարել է, որ Տիգրան Սարգսյանն ու Կճոյանը որեւէ կապ չունեն այդ գործի հետ, եւ, որ ինքն է կեղծել ստորագրությունները։
Աշոտ Սուքիասյանն այս գործով միակ դատապարտվածն է։