ԱԺ ճեպազրույցների ժամանակ «Լուսավոր Հայաստան» խմբակցության ղեկավար Էդմոն Մարուքյանը հայտարարեց, որ յուրաքանչյուր երկիր իր ունեցած հարստության 10 տոկոսն է տրամադրել կորոնավիրուսի հետևանքով տուժած բնակչության աջակցությանը, եթե խոսք է գնում հարուստ երկրի մասին, տրամադրել են իրենց հարստության ՀՆԱ-ի 10 տոկոսը, աղքատի մասին՝ 6 տոկոսի չափով:
«Հայաստանում հաստատվել է 14 ծրագիր՝ ծայրահեղ բարդ ընթացակարգերով, ընկերություն կա, որ միլիարդավոր դրամների հարկ է վճարում, 150 հզր դրամի ուշացում ունի, չի կարող համարվել բարեխիղճ հարկատու և չի կարող օգտվել զրո տոկոս վարկերից: Սոցիալական ծրագրերից շատերն են բարդացված, այսինքն՝ 14 ծրագրի փոխարեն պետք է լիներ 1 կամ 2 ծրագիր՝ սոցիալական ու տնտեսական, վերցվեր մեր ՀՆԱ-ի 5-10 տոկսսի չափով աջակցություն տրամադրվեր, հիմա ՀՀ ՀՆԱ-ի 0,84 տոկոսի չափ է, այսինքն՝ այս գումարը, որ նշվում է, մեծ մասը հետ եկող փող է, վարկ ենք տալիս, սուբսիդավորում ենք տոկոսները, 1 տոկոսն էլ չի կազմում, որ հանել ենք, ասում ենք՝ ժողովուրդ ջան, ձեզ աջակցություն»,- ասաց Մարուքյանը:
Նրա խոսքերով՝ դանդաղ, հանդարտ ընթանում է գործընթացը, և նրա տպավորությամբ՝ այս ծրագրերի համախումբը նրա համար է, որ մարդիկ մտածեն, որ մեծ աջակցություն է տրամադրվում, վերջում քչերին է հասնում:
«Հետո կառավարության նիստերի ժամանակ, որ ասվում է՝ 2 մլրդ դրամ տրվեց այս հարցով, այն հարցով, ժողովուրդը տեսնում ու ասում է, բայց մենք չենք ստացել, սա պետք է ընթանար հնարավորինս դյուրին ընթացակյարգերով: «Լուսավոր Հայաստան»-ի առաջարկը՝ 5-10 տոկոսը տրամադրվեր անվերադարձ և հնարավորինս դյուրին ընթացակարգերով»: