«Դոմոդեդովո» օդանավակայանի անվտանգության աշխատակիցներն այնտեղ գիշերող հայերին ասել են՝ վաղը չէ մյուս օրը թռիչք եք ունենալու, կվերադառնաք Հայաստան, և հորդորել են դուրս գալ այնտեղից. այս մասին Tert.am-ի հետ զրույցում ասաց ՀՅԴ Հայ Դատի Մոսկվայի գրասենյակի ղեկավար Ներսես Ներսեսյանը:
«Երեկ երեկոյան հայերին արդեն վտարել են օդանավակյանից, ուղղակի հանել են դուրս: Ես երբ տեղեկացա, արդեն նրանց մի մասը դրսում էր, մի մասը դեռևս օդանավակայանում էր, դուրս էին գալիս բակային հատված: Այս պահի դրությամբ բոլորը տեղավորված են: Որևէ բռնություն չի կիրառվել ոստիկանների, անվտանգության աշխատակիցների կողմից, ուղղակի հորդորել և բացատրել են, որ աշխատակարգը և անվտանգության կանոնները պահանջում են, որ հավաքված մարդիկ ազատեն տարածքը։ Տեղում հավաքված, ինքնակազմակերպված մեր հայրենակիցները ենթարկվել են հրահանգներին և ազատել են տարածքը, ազատելուց անմիջապես հետո կապվել են մեզ հետ, և մենք արագ արձագանքելով՝ գնացել ենք այնտեղ, մինչև գիշերվա ժամը երկուսն արդեն բոլորը տեղավորված են եղել»,- ասաց Ներսեսյանը:
Հարցին՝ ովքեր են տեղավորել մարդկանց, նա պատասխանեց 12 հոգու տեղավերել է ՀՅԴ Հայ Դատի գրասենյակը, նաև տեղեկացվել է դեսպանատունը, դեսպանատունը նույնպես ջանքեր է գործադրել, ուղղակի տեղյակ չէին: «Ես մեր մասով գիտեմ: Տարել ենք այն մարդկանց, որոնք որևէ հույս չունեին որևէ տեղ գնալու, գիշերը ժամը մեկին ես օդանավակայանից իրենց տեղափոխել եմ ժամանակավոր կացարան: Այսօր առավոտյան ստացանք զանգ մեր 11 հայրենակիցներից, որոնք ինքնուրույն տեղավորվել էին «Դոմոդեդովո» օդանավակայանից 12 կմ հեռավորությամբ գտնվող մի բնակավայրում, մտերիներից մեկի տանը, բայց այսօր արդեն իրենց անհրաժեշտ է տեղավորել կացարաններում»,- ասաց նա:
Ներսես Ներսեսյանը նշեց, որ այդ հարցով պատրաստվում է կապվել թե՛ դեսպանատան, թե՛ համայնքային կառույցի՝ «Հայերի միության» հետ, որ նրանց էլ տեղավորեն: «Մնացածը տեղավորված են՝ ով ինչպես կրողացել է, բոլորն ապահովված են այս պահին սննդով, որևէ վտանգ չի սպառնում»:
Իսկ թե ինչու է այսքան ժամանակ անց օդանավակայանի ղեկավարությունը որոշել դուրս հանել հայերին, քանի որ նրանք այնտեղ գիշերել եմ ապրիլի 12-ից սկսած, Ներսեսյանն ասաց, որ հորդորել են ազատել տարածքը, որովհետև խնդիր էր դրված օդանավակայանի անվտանգության աշխատակիցների առաջ՝ օր առաջ վերականգնել օդանավակայանի բնականոն վիճակը.
«Կուտակումները, սոցիալական հեռավորության չպահպաանումը կորոնավիրուսի համավարակի շրջանում ռիսկեր էին առաջացնում։ Այն պահից սկսած, երբ արդեն հստակ է եղել, որ վաղը չէ մյուս օրը պետք է թռիչք լինի, օդանավակայանի անվտանգության աշխատակիցները ընդամենը հորդորել են գնալ և վաղը չէ մյուս օրը գալ և տեղափոխվել Հայաստան, մեր հայրենակիցներն էլ, առանց որևէ սկանդալի, լքել են տարածքը»,- տեղեկացրեց նա:
Ճշտող հարցին՝ ապրիլի 23-ին չվերթ է լինելու, նա արձագանքեց. «Դա այն տեղեկատվությունն է, որ փոխանցել են օդանավակայանում գտնվող մեր հայրենակիցներին օդանավակայանի անվտանգության աշխատակիցները: Նրանց խոսքով՝ իրենց տեղեկություն է հասել, ասել են՝ գնացեք, տեղավորվեք, մի խանգարեք կարգը, մենք այլևս չենք կարող հանդուրժել այս վիճակը, քանի որ արդեն հստակ է, որ երկու օրից ունեք թռիչք և կտեղափոխվեք Հայաստան, հիմա մենք չգիտենք՝ դա իրականությանը համապատասխանում է, թե ոչ»: