Ազգային ժողովում արտահերթ նիստի ժամանակ իմքայլական պատգամավոր Հովհաննես Իգիթյանը խոսեց երեկ՝ Վանաձորում «Գլորիա» կարի ֆաբրիկայի աշխատակիցների ակցիայի մասին:
Պատգամավորը հայտարարեց, որ հիմա մենք գտնվում ենք ոչ սովորական վիճակում, որը կապված է պանդեմիայի հետ. «Ես տեսա, որ մոտ 100 հոգի հավաքված են մի տեղ ու պահանջում են աշխատանք: Ինձ մի հարց է հետաքրքրում՝ կապված կորոնավիրուսի հետ: Այս մարդիկ իրար կողք էին կանգնած: Նայեք Վրաստանում իրավիճակը չի վերահսկվում, ինչպես մեզ մոտ, որովհետև նրանք հասցեական ձևով չգիտեն, թե որտեղից է գալիս վարակը:
Մենք կարող ենք գտնվել այդպիսի վիճակում:
Վրաստանում 4 մեծագույն քաղաքները փակ են: Փակեցին, որովհետև չգիտեին՝ կոնկրետ տվյալ քաղաքում որտեղ է ինֆեկցիայի հասցեն: Այն, ինչ տեսանք Վանաձորում, կարող է այդպիսի իրավիճակ ստեղծել այնտեղ:
Իհարկե մարդիկ կան, որ պետք է նպաստ ստանան, իհարկե գործարանը պետք է աշխատի, եթե կարող է, եթե կառավարության որոշումն անվտանգության հետ կապված հարցերն ապահովում է: Բայց այն, ինչ կատարվում է անընդունելի է:
Երեկվա կատարվածի արդյունքում կարող են Վանաձորում լուրջ թվեր լինեն, իրավիճակը կարող է վերահսկողությունից դուրս գալ»:
Ավելի վաղ գործարանի հարցը բարձրացրել էր նաև Էդմոն Մարուքյանը կոչ անելով պատկան մարմիններին պարզաբանել հարցը՝ ի վերջո իրավունք ունեն մարդիկ աշխատելու, թե՝ ոչ: