Եթե վարակի տարածման տեմպերը շարունակվեն վերջին օրերի դինամիկայով, մենք կարող ենք ունենալ կառավարելիությունից դուրս իրավիճակ՝ դրանից բխող բոլոր ողբերգական հետեւանքներով: Այս մասին այսօր՝ ապրիլի 22-ին, ԱԺ-ում հայտարարեց ԱԺ անկախ պատգամավոր Արման Բաբաջանյանը:
«Չափազանց մտահոգիչ է հայտնի բաջանաղի ղեկավարած Հանրային ծառայությունները կարգավորող հանձնաժողովի այսօրվա տարածած հայտարարությունը: Ես չեմ քննարկում, թե մեր բնակիչներն ունե՞ն բավարար միջոցներ կոմունալ վճարումները կատարելու համար, բայց բուն տեքստը, որ ֆորսմաժորը հաղթահարված է, ինքնին վտանգավոր է: Դա առաջացնում է ռիսկեր, որ մարդիկ ուղղակի կարող են ավելի հանգիստ նայել ստեղծված իրավիճակին եւ հաղթահարված համարել համաճարակը:Ես դատապարտում եմ կառավարության եւ նշված հանձնաժողովի այդ հայտարարությունը: Սա համաճարակի հաղթահարման իմիտիացիայի փորձ է: Կոչ եմ անում չթուլացնել զգոնությունը, կորոնավիրուսը շարունակում է տարածվել:
Որեւէ տնտեսական նպատակ, այդ թվում հնական մենաշնորհներ ունեցող ընկերությունների վճարումները չեն կարող արդարացնել այն վտանգը, որ ստեղծվում է նման անիրական հայտարարություններով: Պետությունը պետք է կարողանա գտնել միջոցներ քաղաքացիների կոմունալ վճարումների հարցը գոնե ժամանակավոր լուծելու համար»,-ընդգծեց նա: