Մեկուսացված քաղաքացիներով վայբերում չաթ ենք բացել, միասին շփվում ենք, որ մեկուսացված չզգանք, չձանձրանանք։ Այս մասին այսօր՝ ապրիլի 24–ին, NEWS.am-ի հետ զրույցում ասաց երեկ Մոսկվա–Սանկտ–Պետերբուրգ–Երեւան հատուկ չվերթով վերադարձած մեր հայրենակից Լիանա Հովհաննիսյանը։
«Ամեն տարի դեկտեմբերին մեկնում եմ Մոսկվա, որպեսզի Նոր տարին եղբորս ընտանիքի հետ նշեմ, եւ գարնանը վերադառնում եմ։ Այս տարի մարտի վերջին թռիչքները չեղարկել էին։ Ապրիլի 2–ին դիմել եմ ՌԴ–ում ՀՀ դեսպանություն, երեկ մոտ 150 մարդու հետ միասին մեկնեցինք Սանկտ–Պետերբուրգ, այնտեղից էլի հայեր միացան եւ մոտ 250 հոգով վերադարձանք Հայաստան։ Թռիչքը ոչ բոլորի համար էր անվճար, ընտանիքներ կային, որ 4–5 հոգի էին, 3–ն անվճար էր, 1 հոգու համար վճարել էին, 1 անձ կար, որը վճարել էր, Սանկտ–Պետերբուրգից էր, ես Մոսկվայից եկել եմ, անվճար է եղել, բայց անվճար է եղել ոչ բոլորի համար։ Շատ հնարավոր է՝ դեսպանատան կողմից անվճար է եղել, բայց թե այնտեղ ինչ է կատարվել՝ չգիտեմ։ Մեզ հետ կային նաեւ մեծ տատիկ, պապիկներ, կային նաեւ երեխաներ, այդ թվում՝ հաշմանդամության խնդիր ունեցող 2 երեխաներ։ Այստեղ մեզ շատ լավ դիմավորեցին, մեծ ավտոբուսներ էին կանգնած, ամեն մեկում 20–30 հոգի նստեցրին եւ բերեցին հյուրանոց։ Մենք Երեւանի «Իմպերիալ» հյուրանոցում ենք հիմա, ամեն ինչ շատ լավ է կազմակերպված, այդ թվում՝ սնունդը, սպասարկող անձնակազմը շատ բարեհամբույր են»,– ասաց նա։
Քաղաքացու խոսքով՝ «Զվարթնոց» օդանավակայնում նաեւ շտապօգնության աշխատակիցներն են եղել եւ ջերմաչափում են իրականացրել. «Հստակ թիվը չեմ հիշի, բայց կարծեմ 2–3 հոգու մոտ առկա է եղել ջերմություն, նրանց առանձնացրեցին եւ տարան։ Ես հյուրանոցի իմ համարում մենակ եմ մնում, չաթով շփվում ենք, որ չձանձրանք, գիտեմ, որ էլի մարդ կա, որ մենակ է, ովքեր ընտանիքով են՝ ընտանիքի անդամներով են մնում»։