Խոսակցությունները, թե եղանակի տաքացման պայմաններում կորոնավիրուսը նահանջ է ապրելու, դեռ հաստատված և ապացուցված չեն։ Այս մասին «Հեռանկարի» հեռավար թողարկման ժամանակ ասել է առողջապահության նախարար Արսեն Թորոսյանը։ Նրա խոսքերով՝ այդպիսի տվյալները դեռ ստուգման կարիք ունեն։
Թորոսյանը բացատրեց, որ ցուրտ եղանակներին շնչառական վարակների տարածումը պայմանավորված է նրանով, որ մարդիկ ավելի շատ են փակ տարածքներում լինում, և այդ տարածքներում էլ շատ մոտ են լինում իրար, ինչի հետևանքով էլ վիրուսները արագ տարածվում են։ Թորոսյանի խոսքերով՝ եղանակի տաքացումից կորոնավիրուսի տարածման նվազումը դեռ անհրաժեշտ է ուսումնասիրել։
Ինչ վերաբերում է այն պնդումներին, թե մեկ անգամ վարակվելուց հետո մարդիկ այլևս չեն վարակվում կորոնավիրուսով, նույնպես դեռ ապացուցված չէ։ Թորոսյանը բացատրեց, որ այդպիսի պնդման համար առիթ է այն, որ վարակվելուց հետո մարդկանց մեծ մասն այնուամենայնիվ բուժվում է, սակայն դա դեռ ապացույց չէ։
Թորոսյանը բացատրեց նաև արյան փոխներարկումների տարբերակը, երբ առողջացածների արյան պլազման ներարկում են վարակն ունեցողներին, որպեսզի նրա մարմնում նույնպես առաջանան հակամարմիններ։ Այդ հակամարմինները պայքարում են կորոնավիրուսի դեմ։
Նախարարի խոսքերով՝ դա բարդ գործընթաց է, և իրենք փորձելու են երկու բուժհաստատությունում իրականացնել այդպիսի պրոցեդուրաներ։