Կորոնոավիրուսի տարածման տեմպերը բացարձակ թվերով ավելանում են, բայց տոկոսները նույնն են։ Քանի որ բազան մեծանում է, հետևաբար թվերն էլ են մեծանում։ Այս մասին այսօր՝ ապրիլի 26–ին, «Ազատության» եթերում ասել է Առողջապահության նախարար Արսեն Թորոսյանը՝ անդրադառնալով վերջին շաբաթվա ընթացքում Հայաստանում կորոնավիրուսով վարակվածների թվի աճին։
Նշենք, որ անցնող շաբաթվա ընթացքում Հայաստանում արձանագրվել է 407 նոր դեպք, 253 առողջացած, վեց մահ։
«Ցավոք սրտի, ունենք օջախների բազմազանություն։ Այսինք, եթե բռնկման սկզբին՝ մարտի կեսերին, ունեինք հստակ մեկ, երկու, հետո՝ երեք օջախ, դրանից հետո վիրուսի տարածումն այդ օջախներից դուրս եկավ, ու այժմ արդեն տասնյակ, երբեմն քսան իրար հետ կապ չունեցող օջախներ են, ու մենք չենք կարողանում թելերը գտնել, կապել առաջին օջախների հետ։ Դա բնական է, որովհետև շատ են ասիմպտոմ դեպքերը, հնարավոր է՝ վարակը տարածված լինի մի մարդուց, որը չի իմացել, որ ինքը վարակված է»,– ասաց նա։
Արսեն Թորոսյանի խոսքով՝ վարակի տարածման մյուս «դժբախտ ուղղությունը» բժշկական կենտրոններն են։
«Մենք մեր բոլոր ուժերն այժմ կենտրոնացրել ենք բժշկական կենտրոնների տարածքում հիվանդության տարածումը կանխելու, բժիշկների և այլ հիվանդություններով պացիենտներին պաշտպանելու համար»,– ասաց նա։ Նախարարի խոսքով՝ թվի աճը պայմանավորված է նաև ավելի մեծ շարժունակությամբ՝ ավելի մեծ շարժ փողոցներում՝ միջմարզային և ներքաղաքային, ավելի շատ բաց տնտեսվարողներ։
Իր խոսքում նախարարը նաև անդրադարձավ Նորաշենի դեպքին՝ նշելով, որ տեղի ունեցածն իրենց բաթողնման հետևանքն էր։
«Մեր բացթողումն է եղել, որ մեկուսացված քաղաքացուն թույլատրել ենք մասնակցել հուղարկավորության»,– ասաց նաև հավելել, որ դեպքից հետո այդ պրակտիկան դադարեցրել են։
Ըստ նախարարի՝ մեկուսացման 14 օրը լրանալուց հետո արտերկրից ժամանած մեր քաղաքացիների 10–15 տոկոսի մոտ լինում են դրական դեպքեր։ Ինչ վերաբերվում մեկուսացման վայրերին, ապա դրանք 27-ն են՝ 5–10 հոգանոց բժշկական անձնակազմով։
«Հյուրանոցների մեծ մասը գտնվում են Ծաղկաձորում, մոտ տասը՝ Երևանում, և ավելի քիչ՝ Գյումրիում, Վանաձորում ու Տավուշի մարզում»,– ասաց Թորոսյանը։