Մեր աղբյուրի փոխանցմամբ՝ Կոտայքի մարզի Եղվարդ քաղաքի «Նաիրիի» բժշկական կենտրոնի աշխատակիցներից մեկը վարակվել է կորոնավիրուսով։
Վարակվածը հանդիսանում է Եղվարդի «Նաիրիի» բժշկական կենտրոնի ադմինիստրատիվ աշխատակիցը, ով հաճախել է աշխատանքի՝ հավանաբար վարակելով նաև հիվանդանոցի բուժանձնակազմին։ Հիվանդանոցի աշխատակիցն իր հերթին վարակվել է ամուսնուց։ Մեր տեղեկությունների համաձայն՝ աշխատակցի ամուսինը աշխատում է զորամասերից մեկում։
Այսօր՝ ապրիլի 27-ին, վաղ առավոտից ԲԿ-ի բուժանձնակազմը, որոնք շփում են ունեցել հիվանդանոցի ադմինիստրատիվ աշխակացի հետ, թեստավորվում են։
Մենք տեղեկությունը ճշտելու համար կապ հաստատեցինք Եղվարդ համայնքի ղեկավար Նորայր Սարգսյանի հետ, ով մեզ հետ զրույցում հաստատեց տեղեկությունը և հայտնեց, որ վարակվածը հիվանդանոցի օպերատորն է, որը վարակվել է իր ամուսնուց։ Հաստատված վարակակիրներ են նաև քաղաքացու եղբայրը և եղբոր կինը, այսինքն՝ թվով 4 անձ։
Այս պահին ընթացքի մեջ է հիվանդանոցի ամբողջ աշխատակազմի թեստավորումը։ Վարակվածների շփման շրջանակները և մեկուսացման աշխատանքները ևս ընթանում են։
Թե որտեղից է վարակվել քաղաքացին, ըստ համայնքապետի, դեռևս հայտնի չէ, քանի որ քաղաքից դուրս կամ այլ շփում չի եղել։
Փորձեցինք տեղեկություններ ստանալ նաև «Նաիրիի» ԲԿ-ից, սակայն մեր զանգերն անպատասխան մնացին։
Նշենք, որ մեր աղբյուրի փոխանցմամբ «Նաիրիի» ԲԿ-ում և Եղվարդ քաղաքում մթնոլորտը բավական լարված է։ Բնակիչները անհանգիստ են, քանի որ վարակված աշխատակցի շփման շրջանակը պարզ չէ։ Հիվանդանոցի բուժանձնակազմը նույնպես անհանգիստ է, քանի որ վերջիններս այս ընթացքում շփում են ունեցել նաև հիվանդների հետ։
Աղբյուր՝ AntiFake.am